ما نعرف نطيب واااااااااااالوووووو..ممكن تساعدوني

الزعيمة · 2013-07-06, 13:12

مساء الخير عليكم يا فحلات المنتدى
هاذي مدة طويلة ماللي سجلت فالمنتدى مي كنت ندور غير في منتدى التوظيف و عقود ما قبل التشغيل اللي هو شغلي الشاغل في الحصول على منصب دائم
كي لحق رمضان ...و بعدما تزوجت اختي ...لقيت روحي في وجه المدفع وانا المسؤولة و المساعدة الوحيدة لماما فالبيت و خاصة فالكوزينة
مي لقيت روحي حاصلة ما نعرف واااااااااااااالو
لا طياب لا حلوى لا تحلية لا عصير لا سلطة لا مربى
من الاخر واااااااااااااااااااااااااااااااااااااااااالو
من البارح نتفرج على الوصفات نتاعكم و تطبيقاتكم و كذا التعليقات على بعضكم و كأنكم اخوات بالفعل و كيفاش تشجعوا بعضاكم وتتنافسو فالتطبيقات و تساعدو وووو غيرو وغيرو من الاشياء الجملية اللي لمستها فيكم
حبيت نكون وحدة من بينكم تعلموني وحدة و حدة و ماتبخلوش عليا بوصفاتكم و خصوصي مساعداتكم ليا و الاجابة على اسئلتي اللي رايحة تكون كثيرة و ممكن بايخة بالنسبة ليكم
علابالي حكيت بزاف مي
خلاص كملت
نزيد حاجة برك
كل الوصفات و التطبيقات تاع الاخوات روووووووووووعة و نتمنى لو نجرب على الاقل ربعها مشي نصفها
اللي نشوفها نقول هادي نجربها بربي نشالله نزيد نشوف الوصفة الاخرى نقول لالا هاذي خير نجربها وهكذا
مي انا مبتدئة و مانعرف والو وكاين بعض الصوالح جدد عليا ومانعرفش وين نلقاهم وكيفاش نستعملهم
فهل رايحين ترحبو بيا بيناتكم وتورولي؟

إلهام07 · 2013-07-06, 13:23

الحل سهل وبسيط باش نكونو ديما معاك ونجاوبوك ونوقفو معاك أرواحي هنا تلقاينا كل وقت نعاونوك ونعطويك نصائح نوجهوك ونبقاو معاك مرحلة بمرحلة وأكيد رايحين ننصحوك قبل ماطبقي وصفة استشيرينا باش نعطيوك أحسن وصفة مضمونة في المنتدى ، شاركينا في قسم الدردشة هذا رايح يعجبك بزاف وتتعلمي سريعا ، على ضمانتي لو تكوني نشيطة في طرف 2 شهرين او 3 أشهر رايحة ترجعي شاف تفضلي رانا نستناوك :
https://www.djelfa.info/vb/showthread...post1053432430

الزعيمة · 2013-07-06, 13:42

يا يما الدمعة جاتني من اول رد
صدقيني يا اختي غير الدمعة جاتني ماعلاباليش علاش
مالقيت مانقولي
يعطيك الصحة يا اختي وربي يحفظك و يسهلك الصعيبة ويارب
وشكرا خاص لانك اول وحدة ردت على موضوعي

إلهام07 · 2013-07-06, 13:47

العفو حبيبتي عادي رانا هنا كامل نتعلمو من بعض ، شوفي أنا صح كي دخلت كنت نعرف نطيب بصح فرق كبير بين ضرك و8 اشهر قبل ، أنا ضرك رجع البورطابل نتاعي ما يحبسش طول الوقت اتصالات من العائلة يبغاو نصائح ووصفات من عندي وليت مدام بوحامد ههههههههههه والله كون تكوني حابة تتعلمي رايحة صح ترجعي في مدة قصيرة محترفة
أدخلي كل يوم وين قتلك واسألي واش تحبي تلقايهم كامل يعاونوك ويوقفو معاك وينصحوك فقط اشتشيرينا قبل ماديري أي حاجة راهم لثمة كي عايلة وحدة وكامل قلوبهم ملاح ويحبو يعاونو وزيد زهوة ولمة رووعة
أدخلي عرفيهم بنفسك وتشوفي الترحيب

الزعيمة · 2013-07-06, 13:56

تعيشي ختي ربي يحفظك و يعطيك و يمنيك ياارب
عقبال مانولي محترفة كيفك ان شاء الله
راني دخلت وين قلتيلي وعلى ربي
مي المشكل ماعلاباليش بواش نبدا
كل الوصفت عجبوني واش نجرب واش نخلي
و مع رمضان ...لازم مائدة متنوعة...اختي كانت هي مستكلفة بكلشي ..و زيادة عالبنة ...الشديكور ماعندي مانقول
انا لا بنة لا ديكور
هاد العام نشبع معاير من عند خاوتي

إلهام07 · 2013-07-06, 14:06

هههههههههه لالا متخافيش رانا هنا معاك دخلو معانا مبتدئات كيما أنت والله في ظرف قصير رجعو يحطو تطبيقات نتاع محترفين ماشاء الله تبعي برك واش قتلك شوفي في يوم أو 2 رايحة توالفي يرجعو العضوات كانهم عائلتك الثانية والله راهم ناس ملاح وخدومين جدا دخلي كل يوم وشوفي كيفاش ترجعي مطمئنة وتوالفيهم
واحد مايقدر يقلك واش من وصفة طبقي أنت اللي تعرفي واش يحبو ياكلو في داركم واش هي امكانياتك بصح إذا حبيتي نصيحتي : اختاري من وصفات أم رامي راهي دقيقة ومضمونة 100/100 وساهلة
وكي جي طبقي شاورينا برك في أي حاجة حرتي فيها نعاونوك بإذن الله والله يا الطبخ ماكان ما أسهل منو بمجرد ما طبقي حاجة وحدة وتصلح رايحة تحسي روحك وليتي سوبرمان حاجة ما تخوفك
سالي مجرب ولا تسالي طبيب ههههههههههه

الزعيمة · 2013-07-06, 14:18

ههههههههههههه
عجبتني طريقتك فالرد
كاينة حاجة صح اطلعي المورال و تنحي الخوف وتكورجي الواحد
بربي نشالله نستفاد منكم ومن خخبرتكم ونحمرلكم وجهكم يارب
وامانة عليا نشالله
اي وصفة تنجحلي ويسقسوني عليها راني رايحة نقول اسم صاحبة الوصفة هادي للأمانة
وشكرا ليك مليييييييييييييييون مرة

الأمنيات · 2013-07-06, 14:20

انتي ديري العزم والارادة واحنا رانا معاك بلي جربناه والي درناه ننصوحك
اختاري الوصفه واحنا ننصح ونوجهوا ربي يعينك

الزعيمة · 2013-07-06, 14:26

اقتباس:

المشاركة الأصلية كتبت بواسطة الأمنيات

انتي ديري العزم والارادة واحنا رانا معاك بلي جربناه والي درناه ننصوحك
اختاري الوصفه واحنا ننصح ونوجهوا ربي يعينك

ربي يحفظك حنونة تعيشي
ويسهلك الصعيبة انشالله كيما راكم نبسطولي فالامور و تساعدو فيا
فالوقت الحالي راني من وصفة لوصفة نتنقل ونسجل عندي في ورقة ومن بعد نشالله يبدا التطبيق
بتوجيهاتكم طبعا
ربي يحفظكم ويبارك فيكم يارب

enar · 2013-07-06, 16:10

رانا قاع كيف كيف حتى انا ما نعرفش و كي شفت روعة المنتدى في فن الطبخ و الحلويات راني سجلت فيه باش نتعلم راني الكوزينة جديدة فيها بحالك ,,,,,,,,,,,,ما ذا بيا اكثر لوكان يحطو وصفات الاطباق اكثر من وصفات الحلويات اللي راهي بزاف باش نستفادو منهم الاثنين ...............و مشكوراااااااااااات الاخوات كثيرا على ما يقدمنه لنا.

نور السلام 16 · 2013-07-06, 17:04

اختي ما تتقلقيش سمي بالله و اتكلي على حراير الجلفة انا نسلك راسي في الطبخ و الحلويات بصح مع منتدانا الغالي زدت و راجلي ما تتصوريش شحال فرحان بيا ولا كل يوم يطلب حاجة ون شاء الله بالصبر و العزيمة تصبحين شيف

هديل د · 2013-07-06, 17:13

سلالالالالالالالالالالالام

*ام رامي* · 2013-07-06, 18:54

اهلا ومرحبا بك معنا
انا نعطيك نصيحة واحدة
اللي تخليك محترفة في الطبخ هما شيئين
اولهما حبك للمطبخ وثقتك بنفسك وقولي وداعا للخوف
اذا مش حابة تطبخي مش راح تصلح الطبخة واذا خايفة تواجهي صعوبات والتعليقات السلبية وكانك ما سمعتيهاش اوكي ؟
والحاجة الثانية هي : التطبيق يعني مش راح ينفع تتفرجي ولا تكتبي ولا ديري فوتو كوبي ع الوصفات لاااااا لازم التطبيق وفي هذه المرحلة ممكن تجيك ساهلة وتضبط معاك من اول محاولة وممكن تواجهك صعوبات احنا هنا اسالي على راحتك ودرجة درجة تتعلمي كل شيء ما تستعجليش وما تتقلقيش من حاجة كي ما تصلحش عاوديها نورمال
بالتوفييييييييييييق

lalib40 · 2013-07-06, 18:56

انا نعلمك كيفاه اطيبي ، البوراك ، الشربة ، ............................

الزعيمة · 2013-07-06, 18:59

اقتباس:

المشاركة الأصلية كتبت بواسطة enar

رانا قاع كيف كيف حتى انا ما نعرفش و كي شفت روعة المنتدى في فن الطبخ و الحلويات راني سجلت فيه باش نتعلم راني الكوزينة جديدة فيها بحالك ,,,,,,,,,,,,ما ذا بيا اكثر لوكان يحطو وصفات الاطباق اكثر من وصفات الحلويات اللي راهي بزاف باش نستفادو منهم الاثنين ...............و مشكوراااااااااااات الاخوات كثيرا على ما يقدمنه لنا.

شكرا ليك ولدعمك ليا
والله نفرح كي نلقى بنات بحالتي يعني نقول مانيش وحدي
وفنفس الوقت نحشم في هاد السن وبنات مشي حتى ولاد ومازال مانسلكوش راسنا
وحدة وحدة نشالله ونخرجو بنتيجة ايجابية
نشالله نستفادو مع بعض
وشكرا ليك مرة اخرى