كسرة الشحمة اكلة تقليدية .......بلمسة عصرية........لذيييييذة

[اسمهان79]

السلام عليكم ورحمة الله وبركاته






كسرة الشحمة وشكون ما يعرفهاش خاصة هنا في الشرق نحبوها بزاف اكلة تقليدية بصح تبرد القلب وهذا ما ينفع في هاذ البرد
حبيت نحطها اليوم كموضوع مع اضافات بسيطة
زمان لعجين نتاع كسرة الشحمة كانو يعملوها غير بالدقيق والملح بصح كي طيب تجي لينة كيما كسرة الشخشوخة انا هنا نستعملها بالزيت تجي تتقرمش وما تتشبعش
نجيو للحشوبكري كانو يحطو في المهراس البصل والشحمة والتوابل والحار ويهرسوها ميطيبوش الحشوة بصح كي تكوني تاكلي فيها تحسي بطعم البصل قاوي شوية انا هنا طيبت الحشو كيما نتاع المحاجب
وهاذي صورة المهراس للي ما يعرفوش



مع اضافت اللمسة العصرية وهي اللحم المرحي والفرماج
نبدا ببسم الله
نحتاجو دقيق انا نستعمل دقيق كنزة ملح زيت وشوية خميرة الخبز نبلل بماء دافي كيما نعمل الكسرة العادية وعلاش قلت ماء دافي على خااطر الكسرة كي تبيليها بيه واله وعن تجربة تجي تقولي عليها قاطو طرية وتتقرمش في نفس الوقت المهم نبلل الكسرة نخليها ترتاح مدة ساعة ومن بعد نعجنها باليابس عادي نعجنها مليح



ثم نقسمها ان عملت اربع قرصات وقسمتهم على ثمانية نغطيهم ونخليهم حتى موعد التحظير



نروحو للحشو
نحتاج ربطة بصلة ذيول مهمة جدا



لحم مرحي
ملح فلفل اسود افاح فلفل احمر حار او حلو مرحي
هريسة حسب الذوق
راس فلفل حار مقطع رقيق
دبشة مقطعة
5 سنات ثوم مرحي
قطعة شحم
حبة طماطم مرحية
التحظير
نذبل البصل مليح في شوية زيت ثم نخلطو مع جميع مقادير الحشو مع اضافة اللحم







نحطهم على النار ونخليهم يطيبو شوية ما يطولوش بزاف



نطرح اول قرصة ونزيد الثانية



نحط الاولى على طرشون ونعمللها الحشو ونزيد نحط الفرماج



نغلق بالقرصة الثانية ونغلق الجوانب جيدا
ندهن الطاجين بالزيت ونرفد القرصة بالطرشون ونلوحها باه ما يفزدش الشكل نتاعها



نطيبها على الجيهتين ونقدمها هي من الاحسن تتكل سخونة
راهي حارة وبنينة اممممممممممممم






وممكن تعمليها على شكل ابراج اي نصف دائرة تجي هاااااايلة










تجربي وان شاء الله ما تندميش عليها
في امان الله