¤¦¤jeux d'echec cake ¤¦¤ كيكة الشطرنج ✿ ادخلي نلعب ✿

ladymillion · 2013-08-18, 15:48

واشراكم احبتي ان شاء الله بخير
جبتلكم عملي المتواضع لليوم كيكة الشطرنج بالشرح ويارب تعجبكم تصلح لعيد ميلاد أزواجكم او أولادكم الذكور راح تعجبهم حبيت نشارككم ونفيدكم بيها

التحضير :

بالنسبة للجينواز استعملي أي جينواز تعتمدي عليها وتساعدك
جينواز لي نعتمد عليها شخصيا :
2 بيضتات كاملة
فاني ، رشة ملح
4 م ك سكر
4 م ك زيت
5 م ك فرينة
اخفقي عادي مع اضافة الفرينة في الاخير

الصينية لي عملت فيها قطرها 28 سم درت 2 بيضات فيها

نحتاجو طبقتين من الكيكة البيضاء وكل طبقة فيها بيضتان وطيب وحدها كيما في الصورة

حطيهم يطيبوا في بدرحة 180° ماياخدوش وقت بزاف
هنا كي طابوا

كي يبردوا شربيهم بشوي عصير بالبانسو بالخف

بالنسبة للكيكة السوداء نفس الشيء نحتاج 2 كيكات ونفس المقادير فقط كي ندير كاكاو نبدل كمية الفرينة (( 2 م ك فرينة + 2م ك كاكاو اسود ))

كي يبردا خذي صحن يكون صغير شوي من دائرة الكيكة البيضاء والسوداء واقسمي بالسكين اليك الصور تشرح ماتحتاجيش الصحون بزاف وتكتري الفوضى لالا لاحظي طريقة التقطيع
وبين كل دائرة ندير شوي كريم شانتي باش يلصقو

الطبقة الاولى خلصت من تحضيرها هنا ونفس الطريقة بالنسبة للطبقات الثلاثة الباقية
راح يكون عندنا 4 طبقات وبين كل طبقة وطبقة ندير كريم شانتيي أو أي كريمة الزبدة

على جواني الكيكة ديري الكريمة طبعا ، انا اخترت ندير عليها بيسكوي بيمو راح يلصق بالكريمة

ومن فوق عملت كريمة الزبدة ورشي السكر الناعم مليييح بالمصفاة

وقصي اوراق بشكل مربع وحطي فوق الكيكة كيما في الصورة لكن بالراحة وانا يدي كانت ترجف ههههههههه تقول كنت نلعب صح

كي تحطي الاوراق زيدي رشي الكاكاو الاسود
ونحاول ننزع الاوراق بالشوووووي من غير مانحرك يدينا وراح تكون عندنا مربعات بيضاء وسوداء مثل الشطرنج

خليها تبرد ملييح وتتماسك وقدميها

انا خدمت من قبل بعجينة السكر أشكال هاذ اللعبة لكن فسدوهملي الاولاد

فقدمتها بهاذوا نتاع البلاستيك نتاع الاولاد

من داخل لاحظي 4 طبقات

نتمنى تكون عجبتكم وتجربوها

ام احمد وصال · 2013-08-18, 15:59

الله يبارك عليك ايمان ماشاء الله ابداع ربي يحفظك

*نآدرة~ · 2013-08-18, 16:15

اسمحيلي والله غير عجزت على الرد،حاجة روعة فن وتحفة الله يبارك الله شدلك في ذوك اليدين،كي تشوفيها تقولي صعيبة بالصح كي سهلتيهالنا بالصور ولا اسهل منها،يعطيك الصحة وربي يعطيك ماتتمناي ويزيدك من فضله
روعة بكل ما تحمله الكلمة من معني
شكرا جزيلا على الشرح