الي تعرف جزار تسألو

ام ظافر · 2016-09-16, 15:42

السلام عليكم
اخواتي ربي يحفظكم في كل عيد اضحى المراة وخاصة الي عندها الاطفال صغار تتغبن بزاف ماكانش المعونة من جيه والاطفال الصغار من جيه وووووووما يلحق عليها المساء حتى ظهرها يتقسم ورجليها يتشققو من الوقفة والاهم انها ماتخرج ما تغافر حد ممكن حتى الهاتف ماتلقاش وقت ترد عليه
دخلت لغوغل ولقيت طرق مبسطة وسهلة للسلخ وتقطيع الجزرة واطباق منوعة ووووووو ولكن
طريقة غسل الدوارة في قصعة او تحت الحنفية ما قنعتنيش
لانو في الجنوب الغربي للجزائر المعروف بنوعية ولذة الكباش تاعو خاصة ولاية النعامة لما تشري دوارة في ساير الايام تشريها لاصقة في بعضاها مثلما خلقها ربي ولكن منقية بطريقة احترافية
والله اني نشريها والمصران والكرشة والامعاء الدقيقة والغليظة مازالها لاصقة في بعضاها بالشحم تاعها يعني ما فرزوهاش كل حاجة بجيه يعني ما نزعوهاش اصلا من الكبش حتى نقاوها فيه ......ايه ينقيوها وهي مازالها في الكبش والي يحيرني حتى تصدام القاضي او طلاق النسا مثل ما يقولولو الجزء الي يكون بين المصران الغليظ والكرشة وفيه طبقات بزاف يخرج منقي خير من تنقيه بوحدو ......والله تقدري تشريها وتقطريها من الماء وتطبخيها باشرة بلا ما تعاوديلها الغسل لانها اصلا نظيفة تشعل
سؤالي الان كيفاه تتنقى الدوارة وهي مازالها راكبة في الكبش سؤال طرحتو على بعض الجزارة ولكن ماحبوش يقولولي وكاين الي قالي كاين مكان دخلي فيه ماء بالتويو بغزارة راح يدفع بكل الفضلات للكرشة ومن بعدها شقي الكرشة من التحت وحدها يتنقى كل شيء وووووولكن حبيت نعرف الطريقة بالتفصيل وما لقيتش الي يوضحلي
من فضلكم الي تعرف جزار يستعمل هذه الطريقة يوريلنا بالتفصيل لانها والله ما تاخذش وقت كبير وتتنقى الدوارة بطريقة رايعة وناقصة تعاب بزاف
الي تجيبلنا الطريقة ليها دعوة خير في كل عيد اضحى مني ومن كل واحدة ساعدتها بهذه الطريقة الرايعة

ام ظافر · 2016-09-17, 12:18

سبحان الله ولا واحدة تعرف جزار

انا هي رزيقة · 2016-09-17, 12:46

موضوع فعلا يستحق الاهتمام اختي راكي شوقتيني باه نعرف هذ الطريقة العجيبة في تنقية الدوارة . انا نعرف ولاد خالتي جزارين بصح مجيش الدوارة تاعهم بهذا النقاء الذي تصفيه هي صح مشي موسخة يعني ينزعو الاوساخ من الكرشة و الامعاء باستعمال توييو تع الماء بغزارة بصح مازال فيها خدمة يعني تزيدي تنقي الكرشة من الطبقة الخشينة و تصفي الامعاء اكثر . لذا راني معاك في انتظار هذه الطريقة السحرية في تنقية الدوارة

فايزة1207 · 2016-09-17, 20:25

صح كاينة منها مرة شفت واحد من العائلة خرجها نقية وصافية ماتزيديش تغسليها
عندك الحق ام ظافر راني معاك ونستنى سكان الجلفة والمسيلة كاش ما ينورونا بالطريقة

ام رضوان · 2016-09-17, 22:08

السلام عليكم
اختي انا الوالد تاعي الله يحفظو كان يخدم مع الجزار وكنت نشوفو كيف يذبح ويسلح والله الكرشة يخرجها مغسولة ولاتفتوفة فيها
والان انا اتبع طريقته بصح لازمك المداومة مش من اول مرة تتعلمي
خذي الكرشة وديري عقدة للمريء باه مايتحلش ومن بعد لوحي التوييو في واحد المصرات تلقايه لاصق فيه كيما يقولو طلاق النساء
وحلي الماء غير بشوية وخليها حتي تنتفخ وانزعي التوييو واقعدي تقلبي في الكرشة وخلطي مليح وكي تتاكدي بلي الماء قاس كل الكرشة وطلاق النساء افتحي فتحة صغيرة بالسكين خلي الماء المتسخ يخرج وعاودي لوحي توييو وخليها تتغسل مليح
يارب نكون افدتك وفهمتي واش قلتلك
بالتوفيق

أ م ساجد وسيم · 2016-09-18, 16:32

خوتي ربي يحفظهم ينظفو دوارة بطريقة هذي بصح راجلي لالا وطريقة هي تعااااااون بزااااف

حياتي نبع امل · 2016-09-18, 20:37

موضوع فعلا يستحق الاهتمام .يعطيك الصحة ام ظافر دايما تجيبي الجديد .والله مادا بينا نتعلمو هاد التقنية
ان شاء الله يفيدونا بالطريقة

nidabaize · 2016-09-18, 21:34

اقتباس:

المشاركة الأصلية كتبت بواسطة ام رضوان

السلام عليكم
اختي انا الوالد تاعي الله يحفظو كان يخدم مع الجزار وكنت نشوفو كيف يذبح ويسلح والله الكرشة يخرجها مغسولة ولاتفتوفة فيها
والان انا اتبع طريقته بصح لازمك المداومة مش من اول مرة تتعلمي
خذي الكرشة وديري عقدة للمريء باه مايتحلش ومن بعد لوحي التوييو في واحد المصرات تلقايه لاصق فيه كيما يقولو طلاق النساء
وحلي الماء غير بشوية وخليها حتي تنتفخ وانزعي التوييو واقعدي تقلبي في الكرشة وخلطي مليح وكي تتاكدي بلي الماء قاس كل الكرشة وطلاق النساء افتحي فتحة صغيرة بالسكين خلي الماء المتسخ يخرج وعاودي لوحي توييو وخليها تتغسل مليح
يارب نكون افدتك وفهمتي واش قلتلك
بالتوفيق

نفس طريقه ام رضوان ومين تكملي ديري ماء الساخن جيدا داخل الدوارة وتركيه دقيقتين او حسب ما تتحملي انا صراحه نديرها فى باسينه صغيرة ونعمر داخل الكرشه بالماء السخون جيدا و نقعد ندلك فيها و نحكها تم ننزع الماء و نحكها مثل ماتحكي الملابس لما تلقي فيها طاشه تم تشليها لما تقلبيها تجدينها بيضاء هده الطريقه جربتها فى العيد كبير 2016 و فعلا باهيه انا من الغرب الجزائري

تاج الوقار16 · 2016-09-19, 00:02

يا اختي احنا تاني يديرو هكذاك في الجنوب الغربي بصح والله جزار ما حب يخبر
مره جربت كي نحاوها وعمرت الما طرطقت عليا في البسينه رجعت للتقليدي
ولكن احنا ما نحلوش المصارن وما نقلبوهمش
انقوهم ونخلوهم محافظين على شكلهم
اللي ما عندهاش الما يسيل من العين احنا نديرو ابريق شاي قديم ونديرو لها الصابون باه ما تجيش مره في مذاقها وتخرج بيضا تهبل
وما نقلبوش المصارن
اما الجزار الله اعلم صح كي نشرو دواره نشروها نقيه نشللوها برك
سمعت بلي يبداوها من المريء مي منيش عارفه

زينب 83 · 2016-09-19, 11:36

اختي انا من بكري ندخل تويو من الثقبة تاع تاعها و نخليها حتى تتعمر و مباعد نحل بالموس فتحة صغيرة يخرج كلشي كلشي و تتنقى بكل سهولة
هاذي الطريقة من زمان نستعملها و فعالة

nidabaize · 2016-09-19, 20:13

موضوع يستحق المتابعه باه العيد الجاي تكون عندنا فكره ما شي غير العيد ثاني انسان مين يدبح فى دارو يكون عندو فكره مثل ما يقولو المصريين "طب خذ فكره" لو كان كاين الصور توضح احسن لكن البركه في الموجود

~راقيــة بأخلاقـــي~ · 2016-09-20, 11:46

يعطيكم الصحة

أم محمد تاج · 2016-09-21, 08:55

موضووع رائع وحتى انا قتلني الفضول نعرف طريقة الجزاااار ولبنات كفاو ووفاو بصح ياريت كانوو صور ولا فيديو للتوضيح اكثر
بارك الله فيك وبارك الله في البنات

ام ظافر · 2016-09-21, 11:08

بارك الله فيكم
اخواتي الي شرحو طريقة تنظيف الكرشة فقط هذيك طريقة بعد ما ننزعوها من الكبش وللاسف تنظف غير الكرشة وحدها ومعتامدتها من بكري الي نحوس عليها طريقة تنظيف الدوارة كامل من البلعوم حتى للمعي الغليظ وهي لاصقة في الكبش مازال ما نزعناهاش منو يعني اغلب الظن انهم يحطو التيو تاع الماء في فتحة الشرج اكرمكم الله او ممكن فتحة يخلقوها هوما جديدة هاذا الي نحوس عليه
وصدقوني الي يتعلم هاذي الطريقة راح يكمل امور العيد على 9 تاع الصباح ماشي يبقى لل12 او اكثر
نتمنى اختي ام ساجد تسالي خاوتك على الطريقة هذي وتشرحيهالنا