لو ضرب زلزال؛ أخي؛ هل تهرب و لو كنت دون ملابس ساترة ؟ أختي هل تهربين دون حجاب ؟

[optimism]

السلام عليكم
مهما قلت ,,,,,,,,,,,,,,,لاتصل الى الحقيقة ,,,,,,,,,,,,,الا ,,,,,,,,,,,,,,,,,,بالتجربة
اللهم ثبتنا يارب

[بنت الحجاج]

هذا الموقف

هو من بين الموقف اللي ما تقدرش تحكم على ردة فعلك بالضبط كيفاه رايحة تكون

حتى تكون فيه

[~ حراير ~]

السلام عليكم و رحمة الله تعالى و بركاته

اخي اغيلاس كنت راح نحمدلك على السلامة و نرد رد خفيف
لكنني تفاجئت بالردود

يا اخي هون عليك
راك وليت صعيب في ردودك
و الي ماعجبوش الكلام خلي كلامه يرجع عليه

..........................
ردي على سؤالك

مانعرف عمري ولا جربت نحس بالزلزال
الحمدلله من 89 و انا متحجبة عمري و لا لعبت بحجابي لا في صغري و لا في كبري لا في فرح و لا في قرح و الحمدلله
لكن بكل صراحة مش ضامنة روحي في مواقف مخيفة
لاني عارفة روحي كي نخاف نحب نركز تفكيري
و نحب نسمع الصمت باش نركز
لكن اكيد اخر حاجة راح نسمعها هي الصمت
على هك الله اعلم
ماقدرتش نتخيل او نعرف نجاوبك

عموما باش ندخل مليح في الخرطي ...............

يوم الزلزلة كنت في مدينة قريبة من العاصمة
و جات ليا جارتي على الـ 11 تطمن عليا انه ماخفتش من الزلزال
لكنها تفاجئت بيا اني ماحسيتلوش خلاص رغم اني كنت نايضة
و اني ماسمعتش في الاخبار انه الزلزلة صرات

بعد ما شبعو جاراتي ضحك عليا
خممت في حاجة وحدة ..............

خممت نحط ذهبي قريب مني باش يسهل عليا نهزو معايا اذا تعاودت الزلزلة مرة اخرى و حسيتلها

لاحول و لا قوة الا بالله
الله يهدينا و يقوي ايماننا و يثبتنا بالعقل و الدين اللهم امين

...................

بالمناسبة انا اؤيد راي الوالدة الكريمة
نضن الي خلاك تنام معاهم هو الخوف
يبدو ذلك من ردودك

[مناد بوفلجة]

السلام عليكم

أمر من هنا لـــ أسلم على أخي أغيلاس

كيف حالك ، إن شاء الله تكون بخير

[~~ أغيلاس ~~]

المشاركة الأصلية كتبت بواسطة اريج المسك

السلام عليكم و رحمة الله تعالى و بركاته

اخي اغيلاس كنت راح نحمدلك على السلامة و نرد رد خفيف
لكنني تفاجئت بالردود

يا اخي هون عليك
راك وليت صعيب في ردودك
و الي ماعجبوش الكلام خلي كلامه يرجع عليه

..........................
ردي على سؤالك

مانعرف عمري ولا جربت نحس بالزلزال
الحمدلله من 89 و انا متحجبة عمري و لا لعبت بحجابي لا في صغري و لا في كبري لا في فرح و لا في قرح و الحمدلله
لكن بكل صراحة مش ضامنة روحي في مواقف مخيفة
لاني عارفة روحي كي نخاف نحب نركز تفكيري
و نحب نسمع الصمت باش نركز
لكن اكيد اخر حاجة راح نسمعها هي الصمت
على هك الله اعلم
ماقدرتش نتخيل او نعرف نجاوبك

عموما باش ندخل مليح في الخرطي ...............

يوم الزلزلة كنت في مدينة قريبة من العاصمة
و جات ليا جارتي على الـ 11 تطمن عليا انه ماخفتش من الزلزال
لكنها تفاجئت بيا اني ماحسيتلوش خلاص رغم اني كنت نايضة
و اني ماسمعتش في الاخبار انه الزلزلة صرات

بعد ما شبعو جاراتي ضحك عليا
خممت في حاجة وحدة ..............

خممت نحط ذهبي قريب مني باش يسهل عليا نهزو معايا اذا تعاودت الزلزلة مرة اخرى و حسيتلها

لاحول و لا قوة الا بالله
الله يهدينا و يقوي ايماننا و يثبتنا بالعقل و الدين اللهم امين

...................

بالمناسبة انا اؤيد راي الوالدة الكريمة
نضن الي خلاك تنام معاهم هو الخوف
يبدو ذلك من ردودك

و عليكم السلام و رحمة الله و بركاته؛

أهلا أهلا أم أريج؛ نورت الموضوع، مشغول حاليا و أرد عليك في عجالة و لي عودة لباقي الردود الطيبة المباركة،

أظن أنك تذكرين أنني ذكرت في همزة وصل : أنني لا أدخل باقي الأقسام حاليا و أنني عاقل فقط في همزة وصل لما اخرج قليلا من بيتي همزة وصل نولي دبزة و دماغ، لكن دبزات و دماغات أخوية ،

و الله أختي يوم الهزة كان كل خوفي على أمي المريضة و أختي و ابنة اختي الصغيرة حتى أن الزلزلة تضرب و انا باه نخرج برا مخرجتش و طلعت فالدروج نجري نقولهم : زلزلة زلزلة اهربووووووووووووا، بأعلى صوتي،،، الهزة في المناطق القريبة من بولوغين كانت قوية و الكثير من سكان العمارات خرجوا إلى الشارع،

حسب ثقافتي الزلزالية المتواضعة؛ الهروب يجب أن يكون في الحمسين ثانية الأولى، هروب بانتظام لأنه لو طالت المدة لتهدم كل شيء، فتحت هذا الموضوع لنستفيد كلنا و نعرف كيفية التعامل مع الزلازل و أنواع ردات الفعل لكن أغلب الردود لم تجب عن كل الاستفسارات و ربما لأننا جميعا لسنا مختصين زلزاليا !

اللهم آمين، قوى الله إيماننا و ثبتنا .

[star maria]

السلام عليكم

فتاة
15 سنة
حي باب الواد المهترىء ذو البنايات الهشة

عشت هزات زموري حين لم اكن اعرف معنى زلزال اصلا -_- ( و كذبوا علي و قالوا سقطت طائرة ,,, و صرت احلم بسقوط الطائرات و الهروب منها ,,,,, رعما كي يقولك طائرة سقطت معنتها سقطت و كملت مي لوكان يفهموني بلي قادرة تجي في اي دقيقة نولي نخاف بزاف )
المهم
كنا نقطن بمسكن هش ,,,, عمارة لكنها قديمة و هشة جدااااا
تشققت الجدران ,,, امي كانت هلعة ,,, تفتحت la bibliothèque و طاحو les services,,,, اسرعت امي الى جدتي ( الله يرحمها ) التي كانت مقعدة في ذلك الوقت ,,,, نسيت اختي الصغيرة الرضيعة فوق السرير ,,,, انا كنت امشي لهذا امرتني بالتشبث بها ,,,, حملت اختي المتوسطة و ساعدت جدتي
في منتصف les escaliers ( لي طاحو كامل اوبعد معا la première secousse ساعد جارنا جدتي و نزلنا ,,, كانت الهزة انتهت ديجا
تركتنا مع الجيران
و صعدت لاستعادة اختي الرضيعة و الوثائق المهمة
ابي كان في سطيف ( بلادنا )

توجهنا الى بيت عمي الموجود بباب الواد لكنه ليس هشا ( و هو منزلنا الان ) ,,,, اتذكر من هذه الرحلة ( ان صح التعبير ) صورتين فقط ,,,, صورة في الساحة تع مسجد النصر l rose حين كنت متشبثة بامي لا افهم شيا و الناس كثر ,, مهنهم من قرر المبيت هناك ,,,و اختي المتوسطة عند امراة لا اعرفها ,, امي تمسكجدتي و الرضيعة ,,,, و حين دخلنا بيت عمي و وجدناهم في حال مستقر رغم ما جرى لبيتنا ( لم اكن افهم قضية بيت هش و بيت جيد اصلااا )
جاء ابي ليلا ,,,, و لانه لم يعرف الزلزال في حياته -_- ( عندو حظ من ذهب ,,,, دايمن يكون فلبلاد كي تدرب زنزلة ,,,,, بحكم عمله ,,, رغم انه اغلب الاوقات في العاصمة ) اعادنا الى البيت الذي تشققت جدرانه و طلب منا الا نخرج مهما جرى
اتذكر اننا نمنا و رؤوسنا تحت الطاولة ( ماما فرشتلنا هكاك ,,,, و انا ما فاهمة والو ) ,,,, و ان امي كان تحمل الرضيعة في porte-bébé و لم تنم ابداا
في اليوم الموالي دربت هزة وحدوخرا
خرجنا بسرعة لاننا كنا متاهبين اصلا
و هنا اتذكر صورة امي حين اغمي عليها في نهاية les escaliers
بعدها لا اتذكر شيئا الى حين وجودنا من بيت الى بيت ( بيوت العائلة ) الى حين انتقال عمي الى بيته الجديد و انتقالنا الى بيته ( و اتذكر حين لم افهم لماذا انتقلنا و قيل لي ان بيتنا سيسقط قريبا ,,,,

كان عمري 4 سنوات
اتذكر كل هذا ( ليس كفلم لكن كصور متقطعة )


الهزة الموالية التي عشتها كانت في شتاء هذا العام ( 4 على سلم رشتر )
اظن ان الناس لم تحس لها
لم تكن قوية كفاية ,,,, كنت في الثانوية ( داخلية ) و تحركت النوافذ المفتوحة
توسوست انا و صاحبتي مي ماجاتش في بالنا زنزلة
حتا عيطو من دارنا و دارهم يسقسو علينا( بعد الاخبار ,,,, )
لم اخش شيئا هنا لانني لم احس اصلا


ناتي لزلزال بولوغين -_-
نودني على 5 صباحا ( باب كان غير كيما خرج من الدار ,,,, لسطيف ,,,, كان فوق واد الحراش ,,,, ماحسش علاجال كان فla voiture مي شاف شوية حجر طاح من الجسر هاداك )
ماما كانت تقول زنزلة زنزلة ( تعيط باش تنودنا زعما ,,, كنا ندنا ديجا ) الله اكبر الله اكبر
خلعتني ( نومي تقيل ,,,, جاتني bizarre هاديك الحالة ,,,, الهزة و الصوووت ,,, مي ماكنتش دايرة الزنزلة في راسي كااااامل )
مي كي ندت مليح و خرجت من الغرفة تاعي ,, كانت مازالت ,,, ماما كانت تقول البسوا صبابطكم نخرجو ( بلا حجاب و خمار بلا والو ,,, سمعنا الجيران فتحو باب لباطيما و خرجو ) انا ماحبيتش مي ماقلت والو ,,, استنيتها تحبس ,, وقفت فلpilier
المهم
غير جازت حوست على حجابي و خماري لبستهم
حلينا الباب و هدرنا مع الجيران
عيطنا لخالي و لبابا
و شعلنا النهار
كنت علابالي بيها 5 علاجال نعرف 4 و نعرف 6 ,,,

لبسنا كامل حجابنا و خمارنا و قعدنا نسناو les secousses
الاولى كانت واعرة
ماما حبت تخرجنا مي انا ماحبيتش تاني و ما قلت والو -_- باسكو علابالي كشما تقولي ههههه
كانت تشهد
المهم كنت نعطل باسكو كنت انا القريبة كامل للباب ,,, indirectement ماخليتهمش يخرجو
علابالي بلي الموت وحدة و ربي كاتب نعيشو و لا نموتو
في الحقيقة كنت في عمق تفكيري عظيم جداااا ( لا استطيع الوصف تماما لكنني فهمت ضعفنا ,, و تقصيرنا و مصيرنا ,,,, )
و كنت اعلم تماما ان امي تحت تاثير ذكريات 2003 و انها موسوسة و خوافة جدا فيما يتعلق بمثل هذه الامور

المهم
اطلت كثيرا لكن ارجو ان يكون الوصف كفيلا بتحسيس البعض بحجم الكارثة -_- خاصة نفسيا
( الردود ماتفرحش بزاف -_- ,,,, يقلقوني لي يقولك ماكاين والو و نورمالمون توالفو -_- ,,, ياحبيبي ( كيما يقول كونان ) نتا capable توالف المرض ؟ و لا توالف الموت ؟ ياك كامل الناس تموت ,,, مالا ماتبكيش على وليدك و لا باباك كي يموتو !!! )

انا غير مستعدة للهرب من البيت اصلا ,,,, لانني اعلم انه لا مفر في هذه الحالات ,,,,, رغم انني مقصرة في حق ربي الا انني لا استطيع تماما ايصال جوهر الفكرة
كنتا اتالم ,, صحيح ,,, ليس لانني خفت الموت و اردت الخلود
بل لانني قصرت في حق ربي
كنت اتمنى الحياة لكي القى ربي افضل من تلك الحالة في يوم من الايام

فما بالك ان اهرب ,, بدون حجاب ( قعدت بيه لمنتصف النهار ,,,, و خفت ندوش )

( و على فكرة ,,,,, كل العائلة عادت للنوم الا انا ,,, شدة التفكير كانت تزيد مع مرور الوقت ,,,,, و كنت احس للهزات الارتدادية ,,,, احسست ل 9 هزات في يومين ,,,, باقي الايام لم اكن اصدق نفسي تماما ,,, )


عفوا على الاطالة

[~ حراير ~]

السلام عليكم و رحمة الله تعالى و بركاته
اخي اغيلاس ربي يشفي الوالدة و ربي يحفظها و يخليها تاج فوق روسكم اللهم امين

فعلا ماعندناش هاد الثقافة
مرة تفرجت على وثائقي على طرق حديثة للتعامل مع الزلازل في اليابان و لقيت انهم يدرسو ابنائهم كيفية التعامل مع الكوارث الطبيعية
لكن لما نتذكر اخر زلزال صرالهم "نسيت اسمه كي العادة" نقول انه لا منجى و لا ملجأ من الله الا اليه

تفكرت مرة انه فطنت من صوت غريب و كان "خرطوم" الغاز طار من مكانه و الغاز ينسف و ريحتو تعم المكان
من خوفي تفكرت لو اني مت دون ان افطن وش نقول لربي
لكن سرعان مازال هاداك الاحساس و تذكرت رحمة ربي
"الي راني شادة فيها ديما و معولة عليها باش تدخلني للجنة"

................................

بنيتي ستار ماريا بكيتيني ربي يصلح الاحوال تاع الدزاير
ربي يحفظك و يسبل سترو عليك اللهم امين
ماشاء الله عليك
انا كون نجي نعبر على مشاعري و نقعد سمانة و انا نكتب مانقدرش نقول وش قلتي
ماشاء الله تبارك الرحمن عليك
اسلوبك شيق
و كلامك حكم و درر و جواهر

ربي يكملك بالعقل و الدين بنيتي
حبيت نذكرك انه تكوني متفائلة و ديما تفكري رحمة ربي و ماتقنطيش و لا تياسي من رحمة ربي
تفكري انه من شروط التوبة
انه تكون التوبة قبل ان تصل الروح للحلقوم او قبل الغرغرة
و هاد راهي رحمة كبيرة من عند ربي
يعني مانخلوش مدخل للشيطان يدخلنا بيه
هو الشيطان يحب يشغلك تفكيرك فتبداي تفكري وش درتي و وش قصرتي في حق نفسك و حق ربك
لكن الاصلح لينا انه تعجلو بالتوبة في اوقات الخوف
انك تستغفري و توبي من قلبك راح يفي بالغرض ان شاء الله

................مانيش نفتي انا ماتنتقدونيش..........

[صدى الأقصى]

في الحقيقة كان زلزال العاصمة أول زلزال عنيف أواجهه
فانا من الشلف وكنت عند أقاربي بالعاصمة
بصراحة في تلك اللحظات بقيت في فراشي والتصقت بأمي وبقيت أشهد وأدع الله
كنت جد خائفة

[~ دروب الخير ~]

سؤال صعب جدا

ليست لدي اجآبة

[الدرّة المصونة]

سؤال في محلله
+++

كما اني شهدت احدى زلالزل العاصمة مع اني لست عاصمية


ماخرجتش نجري و نعيط كيما دارونا ناس العمارة

كانت زلزلة في رمضان و بعد الفجر كنت هاداك وين غفيت حتى نسمع في ختي تقول نوضوا زلزلة ما فقتش لروحي كيفاش نضت صراحة ( انا نومي ثقيل كون ما ينوضنيش عبد ما نفطنش و تتقلب الدنيا على راسي ) مانيش كيما ماريا :d

ردة فعلي اني نضت و بقيت نسنى فيها حتى تحبس و حتى ان خرجت جلباب صلاتي ديما قدامي نلبسو و نخرج خخ

+++

[عطر القرآن]

لا اعلم سؤال صعب

[امونة مينا]

بصراحة انا من الخلعة نترك الحجاب وربي يغفر لاني ماني عملتها برغبتي

[المكارم]

السلام عليكم ورحمة الله وبركاته

بما أن الزلازل لا تتوالى دوريا في دول جنوب المتوسط فإن ثقافتنا الزلزالية ضعيفة

بالمقارنة مع دول شمال المتوسط والأناضول واليابان و... التي توجد في بعض مناطقها

مراكز زلزالية نشطة ..

عايشت بعض الزلازل وشعرت بعشرات الهزات الإرتدادية خصوصا في ال2004

حيث كان مركزه في مدينة مجاورة لمدينتي وكان بقوة 6.5 ، أما آخر الهزات

التي ضربت منطقتنا فكانت يوم الأربعاء الماضي 13 غشت 2014 بقوة 3.8 ..

أثناء الهزّات التي كنت حينها في البيت كان ينتابني شعور غريب وهو مزيج

بين الخوف والطمأنينة ، مع محاولة فهم ما يجري لاستيعاب الموقف ،هذا الأمر

جعلني في كل مرة ألزم مكاني وأنصح أولادي بعدم الخوف والصياح والتزام أماكنهم

لم يكن ردّ فعلي هذا مكتسب من تقافة زلزالية ، فربما هو ناتج من هول الصّدمة

لذا لا أشجّع به أحدا ، وعلى كل واحد أن يتصرّف حسب موقعه وظروفه والبطريقة

التي يراها مناسبة لحالته ..

بارك الله فيك أخي أغيلاس على إتاحتنا الفرصة لنتذكّر أحداثا مضت

تحيتي

[قابضة على الجمر]

بالنسبة للزلزال لم اجرب ...لكن تجربتي كانت في فيضان ...اول ما فعلته جريت و سحبت خمار الصلاة و بعدها فتحت الباب انادي الجيران فقد كنت انا و اختي وحيدتين في المنزل و الماء قد جاوز الركب ...بعدها اجهشت بالبكاء عندما تذكرت كراريسي و كتب و انا في العام النهائي فجريت اصارع المياه و احاول وضعها فوق الخزانة و الحمد لله انني انقذتها و اذكر ان اختي بمجرد ما بدا الماء في الدخول الى المنزل حملت الوحدة المركزية للحاسوب تجري بها من مكان لاخر لان كل بحوثها و دراستها فيها
هههه يوم رعب حقا ..الحمد لله انه مر بسلام

[~~ أغيلاس ~~]

السلام عليكم؛

بارك الله فيكم على المشاركات الطية،

حاليا بعيد عن النت و عليه يتعذر علي الرد،

لي عودة عاجلا أو آجلا للرد على الجميع،

بوركتم .