هذا وين فقت بلي مازلت صغيرة صح

[sirina_angel]

السلام عليكم
*
طلب من الاخوة و الاخوات
حبيت نفرغ واش كاين في قلبي ..مجرد فضفضة
لي عندو هدرة مليحة يهدرها لي ما عندوش ما كالاه يجرح ناس بكلامو
*
*
انا ابلغ من العمر 20 سنة ..تحصلت على بكالوريا بتفوق و الان انا طالبة في المدرسة العليا للاساتذة بالقبة
الى حد دخولي الجامعة
كنت واثقة من نفسي ..الكل يحبني يعني ما كانش واحد عرفني و كرهني ....بشوشة و مرحة
عندي صديقات بزاف دائما مع بعض و جامي زعفنا من بعضنا و كنا في 10
كل النهار معاهم غير في الليل كل واحدة نرقد في دارها
كنت نظن بلي عندي شخصية و راني واعية و ارائي صحيحة
لكن بعد مابقا على اول عام جامعي اكتشفن بلي لالا
و هذا وين عرفت بلي كي كانو يقولولي مازلت صغيرة نقول علاه و انا كبيرة و انا واعية و انا مثقفة
هاد العام عرفت بلي عندي بزاف نقائص في شخصيتي
انا متسرعة ....متسرعة جدا
مثلا انا كنت مقررة نسكن وحدي في السكن الجامعي و هذا بعد مشاكل
و من بعد جات وحدة قاتلي نسكنو مع بعض ...انا قتلها اوكي ....و من بعد ايام قلتلها لالا
اوكي قالتلي نسكنو في نفس الرواق قلتلها اوكي و راحت عاونتني في اعداد الغرفة و من بعد قلتلها لالا
من هاديك قالتلي خلاص ما نزيدش نتفاهم معاك و عندها حق
و من بعد كي رحت للادارة نحط طلب تغيير الغرفة
حطيت وحد الغرفة
و من بعد جات شريكتي في الغرفة قاتلي لالا اني رايحة انا احكمي هادي
غدوة زدت رحت للادارة و بدلت دوموند تاعي
و من بعد زادت جات قالتلي لالا اني رابحة نحكمها و راني دومونديتها
و زدت رحت بدلت دوموند في الادارة
في كل مرة نبدلو بتبهدبلة
هادي لا بروف بلي راني متسرعة جدا
و في كلش حتى في الحوايج كي نشريهم نشريهم و كي نروح لدار نعاود نردهم
*
*
تاني حاجة عاقلة
و العاقل في زمننا ولا جايح و انا جايحة صح
لايشتا حقي ما نقدرش مدافع عليه نحشم نهدر و لا نتقابض
نخاف من المشاكل و الله نخاف و نهرب منهم
دائما كي يصراو مشاكل الناس يجيو يهدرو و يبردو غشهم فيا و انا ما نهدر والو
مي تبفا تغلي في قلبي يو تمردني و طيحلي المورال
و كي نجي ندير حاجة دائما نخمم في الناس كون يزعفو و دائما نخرج انا الغلطة
و لاني ما نحبش نزعفهم بالعكس في النتيجة يزعفو
مالا علاه نقلق روحي بالتخمام فيهم !!!!! و هوما كل واحد يدير واش ريحو
حتى في الادارة كون تدخل وحدة تبدا تعيط و طير دقيقة تقضي حاجتها ولا وحدة تضحك و نحكي كيف كيف
و كي تروح لي ساكتة و تحشم يبهدلوها
و صحاب لمعارف ما نحكيوش
*
*
انا نمامة و ندي الهدرة
هادي شريكتي في الغرفة كانت بيناتنا ماشكل و ربي راه يشوف و الله ولا مرة درت حاجة ضدها الا عن غير قصد و الله دائما قبل ما نجي ندير حاجة نخمم كون تزعف ..و لكن في الاخير نخرج انا ظلمتها
و كنت كي يلقاوني بنات نبكي يقولولي واش بيك كي نولي نحكيلهم
و في اخر مرة قالولي صحاباتي ما تزيديش تجي تحكينا و وحدة قالتلي نعرفك تدي الهدرة و لسانك ماش تاعك
*
*
الشلة تاع 10 صديقات كلها كذب
كنا في 10 بنات دائما نتغداو في لي ريسطورو و نديرو حفلات و نجتمعو في الديار
و زعما كامل متفوقات و من عايلات معروفة و ...... و الله العظيم ما اخترتهم بالتحديد و الله ربي جمعنا
جاو 2 من صديقاتي لنفس لا سيتي لي راني فيه
وانا عرفتهم على طفلة
ضرك وليت انا لي على الهامش
ولاو انا مع هاد الطفلة و هوما يعيطولها يديوها و لا يجيو عندها للغرفة مع انو غرفتيو غرفتها قدام بعضاهم ولا كأني موجودة
لي تغيضني رانا صحبة تاع 5 سنين و اكثر
*
*
نخمم بزااااااااااااااااااااااف
نطلع ونهبط ...نبني و نريب و كل مرة نبدل رايي
و نبكي بزاف و تغيدني بزاف
نبكي قدام اي واحد قدام بروف في لا كلاص في اي بلاصة ما نقدرش محكم
بلاك لاني وحيدة والدي
*
*

الجميع يستغبيني
اول عام ليا في الجامعة وليت ما نحضرش لي كور
و ما نكتبش خلاص مالا كي نجي ندير فوطوكوبي يشبعو تشناف و يكرصوني على كرارسهم مع انو كاين اكثر من 300 واحد يقرا معايا و اي واحد ما نعرفوش يمدلي ندير فوطو كوبي
و الاكثر من هاذا
كي يكونو يهدرو في مجال الدراسة و نهدر انا حاجة ينوضو يضحكو و يقولولي ما كالاه تهدري
مع اني و الله و بدون غرور ما نحضرش و نقرا في اخر سمانة للكونترول و نجيب لي نوط كيفهم و خير منهم
ما يعجبهمش الحال
حتى انو وحدى سلفت عليا دراهم و ما ردتهمليش غيربسيف
ومن بعد التجربة الاولى جات دير التجربة الثانية مع اللباس تروح فيه للدار و هذا لاني غبية
*
*
الكل يهتم براحتو و يدر لي في راسو و كون ما تخممش انت في روحك واحد ما يخمم فيك
*
*
للعلم تقدمت بطلب للسكن انفرادي في السكن الجامعي و انشالله منا وجاي عقلية خلاف كيما يقولو
*
*
غلطت بزاف هاد العام و تعلمت بزاف و تقست بزاف
حتى لو كانت امور تافهة بالنسبة للبعض
هذا وين عرفت دنيا شوي
هدا وين فقت بلي راني صغيرة صح و مازلت صغيرة

تعقددددددددددددددددددت مي الحمد لله بقات 15 يوم
*
*
لي عندو اي اضافة او نصيحة يتفضل
*
*
شكرا لمروركم

[الفلة البيضاء]

ااااااااااااااااااه من الصديقات

[sarra95]

انت اك كيما كنت انا نخاف من الناس تزعف مي نهار ملقيت واحد دارلي حساب و خاف عليا لنزعف
مي انا بدلت العقليا و تهنيت لي يقيسني نقيس هوما مادروش قيمة للصحبة لي بيناتنا
و ربي يعينك اختي
و نشالله تتهناي بالسكن الفردي فالسكن الجامعي

[sirina_angel]

هادي هي الحياة تعلمنا
كي دير حاجة مليحة واحد ما يشوفك و كي دير حاجة مش مليحة كامل يحاسبوك

[ikram403]

الله يكون في عونك يا اختي
هذا هو حال صديقات وقتنا هذا
وفقك الله

[sarl02]

ايه مازلتي صغيرة ومازال اتزيدي تدي كل يوم عبرة وعبرة من مدرسة الحياة ...ولكن عجبتني طريقة تحليلك لتصرفاتك وادراك اخطائك وهفواتك وبالتالي فانت في الاتجاه الصحيح نحو التغيير من حالك واحوالك فلا باس واصلي.وبالتوفيق.

[AMINA.Z]

و الله انا كيفك كنت و مازال القط ياكل عشايا

مي من نهار دخلت للجامعة و انا نتعلم

الفرق بيناتنا انا ما طحتش في فخ الصداقات حتى صحاباتي للي ندور معاهم
و الله نعزهم و نحبهم مي مدايرا حدود بيناتنا

رجع باش تلقاي واحد تاع ثقة صعيب بزاف

الحاجة لاخرى اللي لاحظتها انك مدللة اني كيفك بنت ماما و بابا عندي غير خاوة دكور
كل مرة تبدلي رايك
بويسك والفتي كلش يجي بالساهل

حاولي تبدلي العقلية و ماتندمي على والو
اذا ما ربحتيش اكي تكوني تعلمتي

نصيحة برك يا اختي انتي تتحملي سكن الطالبات و البعد عن الوالدين باش تقراي
يكذب عليك اللي يقولك او كاين كلش في الكراس و في البوليكوب روحي احضري $روسك
و حافطي على كرامتك و ما تبقايش تطلبي في الناس

صدقيني الجامعة كون تحبي تستفيدي منها و الله ما تندمي عليها
حتى و لو كان الاستاذ مارg عمرك ماراح تخرجي من كور كيما دخلتي

نتمنى تخلي تكوينك سليم هاكا باه تخرجينا استاذة شاطرة

[دعاء المحبوبة]

السلام عليكم ورحمة الله تعالى وبركاته
دائما السنة الاولى في الجامعة تكون فيها الكثير من التغييرات
وحتى زميلات وصديقات الدراسة كل واحدة تتخذ طريقا خاصا
- وايضا يكون فيها ضغط من الاحساس بالمسؤولية
انصحك بأن تختاري من الصديقات من من تخاف الله وتحافظ على صلاتها ودخلاتها وخرجاتها بالحساب حتى لا تجرك الى ما لا يحمد عقباه
- يوجد الكثيرات من يعتبرن ان الجامعة معناها تحرر من كل القيود حتى الدينية فانصحك ان لا تتبعي طريقهن وليكن دائما هدفك ارضاء الله وحده ، ولتحافظي على حجابك حتى في مطعم الحي.
حفظك الله ورعاك

[شاملة لينة]

الفترة الجامعية فترة عابرة لن تطول .... حتى وإن كونت صداقات ولو رأيتها متينة. فصدقيني لن تستمر بعد التخرج سيتم التواصل فترة وستنقطع فيما بعد لأن الظروف سوف تتغير...........................
لذلك أنصحك ألا تفكري في هذه الأمور لأن علاقاتك الاجتماعيية سوف تبدأ بعد التخرج وسوف تتعلمين الكثير فالحياة مدرسة كل يوم تمنحنا الجديد.......
أما عن الأسرارالذاتية فلا تمنحيها إلا لأمك أو أختك................................
سلام

[mitrochka]

معليش أختي
مازلت صغيرة
دركا كيما تعدي العام الأول و تبداي في الثاني توالفي بالإقامة
و يظهروا صحابات جدد في حياتك
و هنا خيري وحدة ولا زوج يكونو تاع الصح لعمرك الكل
ماشي 10 تعدي معاهم خمس سنين و من بعد يديروا روحهم ما يعرفوك ماوالو

لأنو صديقتك هي التي إن رأتك على صواب فرحت لك
و إن رأتك على خطأ سارعت لتصويبك
و ليس الإستهزاء بك و تعداد مساوئك

على كل ربي يوفقك

[imi02i]

أرجو منك أن تردي على رسالتي في أقرب وقت

[سرور]

ختي نحلفك والله كنت كيما نتي مي زيد عليك ما نسكتش علا حقي دركعندي20حمد الله حسيت روحي تبدلت مي انا صديقاتي ينصحوني ولا مر جو صددي هدا عام قوليلي راكي تريقلتي حمد الله تقدر تبدلي روجك كل واحد يقدر تسمك في خياتو ويمشيها منين حاب

[daoud93]

مساء الخير لقد قرات مشكلتك بتمعن كبير واستخلصت بعض النقاط والحلول التي ربما قد تساعدك


1 ارضاء الناس غاية لا تدرك ارضي والديك والاهم من هذا ارضاء الله عزل وجل
2 لا داعي من كثرة الاصحاب والاصدقاء والذين قد لا يفيدوك بشئ اختاري من صديقاتك من تثيقين فيها والتي تناسب افكارك وميولاتك وطموحاتك
3 احكي همومك ومشاكل لمن تثيقين فيها ربما هذا قد يخفف من حدتها
4 بما انك انت الان تدرسين في الجامعة وجب عليك الوقوف عند اهدافك وطموحاتك ورغباتك التي قد سطرتيها من قبل وسعيتي من اجلها ومحاولة تحقيقها وهذا هو الاهم
5 بما انني سبق لي وان درست في الجامعة مررت بعدة مشاكل سواءا مع الطلبة المقيمين او مع الطلبة الذين ادرس معهم لكنها تبقى مشاكل عابرة لا يمكنها ان تعيقك في مشوارك الدراسي او ان ان تقف حاجزا في وجه اهدافك وطموحاتك كما يجب ان تتعاملي مع مشاكلك بكل هدوء ورزانة وعدم اعطائها الحجم الاكبر منها
وفي الاخير يجب عليك ان لا تتخلي عن مبادءك ومواقفك التي تربيت من اجلها من اجل تلبية رغبات الاخرين

اتمنى ان اكون قد افدتك بهذه النصائح المتواضعة وبالتوفيق

[~~ أغيلاس ~~]

أحبب حبيك هونا ما عسى أن يصبحك عدوك يوما ما

و أبغض عدوك هونا ما عسى ان يصبح صديقك يوما ما

ــــــــــــــــــــــــــ

لا تنزعجي من اخطائك،

بل افرحي،

فأنت تتعلمين منها،

ــــــــــــــــــــــــــــــــــــــــــــ

أنت تعيشين في محتمع،

و الاجتماع بالغير واجب في حقك ليس شرعا و إنما لتتعلمي و تكوني عضوا في هذا المجتمع،

إياك أن تطلبي سكنا انفراديا فالوحدة قاتلة،

اطلبي سكنا ( جماعيا ) و استخيري الله و ادعي لتكون رفيقاتك من الصالحات،

و لا تظني أن رفيقات غرفتك لن تكون لك معهن مشاكل،

فهذه طبيعة البشر،

ــــــــــــــــــــــــــــــــــــ

زِني كلامك قبل أن تتكلمي، و إياك أن تطلقي العنان للسانك،

أما أسرارك فاحفظيها و لا تبثيها،

( و ما تزيديش تدي و تجيبي الهدرة ههه )،

ـــــــــــــــــــــــــــــــــــــــــــــــــ

انشغلي بربك، بأداء عباداتك، بدراستك، بنفسك،

أما البشر فهم آخر من تفكيرين فيهم،

فقط أدِّ واجباتك اتجاههم و لا تظلمي، و لا تسمحي بأن تُظلَمي،

ــــــــــــــــــــــــــــــــــــ

احضري المحاضرات و كل الدروس و لا تلجئي لغيرك، دعيهم هم يلجؤون إليك،

و إن كنت لا تحضرين ( لي كور ) و تتحصلين على نقاط جيدة فإذا احضري ( لي كور ) و كوني الأولى في الدفعة ،

ــــــــــــــــــــــــــــ

لما تتخرجين من الجامعة ستتذكرين أيامها و كأنها خيال أو طيف،

ــــــــــــــــــــ

نسيت نقولك حاجة؛

و بما أنك طالبة جامعية فهي أهم شيء؛

ما تنسايش تلتزمي بالحجاب الشرعي ،

و اخطيك من حجاب الموضة لأنه ليس حجابا اصلا،

ــــــــــــــــــــــــــــــــــــــــــــــــــ ــــــــــــــ

كل ما تكبري كل ما تزيدي تتعلمي، و عليه لا تحزني لأخطائك، تعلمي منها،

ـــــــــــــــــــــــــــــــــــــ

موفقة أختي الصغيرة .

[sirina_angel]

بارك الله فيكم اخوتي ......مشكورين على الدقائق اللي منحتموني اياها ...مشكورين على كل نصيحة
ان شاء الله نقدر نتقدم نحو التغيير و ما نبقاش مع اللوم .....المدرسة حياة صح
مشكورين