مشكلتي مع زوجي انصحوني

مشكلتي · 2016-01-06, 08:16

السلام عليكم ورحمة الله وبركاته
انا متزوجة وعندي ٤ اطفال كنت عايشة حياة سعيدة بكل ماتحمله الكلمة من معنى
كنت مهنية في داري مع زوجي واولادي دون مشاكل
المشكلة لي غيرت حياتي انو زوجي دار ستاج وربح كنا مضطرين نسافرو
ومن هنا بدات المشاكل اقترحت لزوجي نكرو سكنا تكون قريبا لمكان لي رايح يقرا فيه رفض وقالي نسكنو عند والديا باش مايزعفوش مني ونبقى نروح نقرا ونجي لعندكم
بصراحة انا ماقبلتش علاخاطر اهله خاصة ابوه مايحبنيش بلا سبب وزوجي علاباله بصح الله غالب والديه ماعنده ما يدير

وبعد رحلنا وسكنا عند والديه في الايام الاولى كلش كان عادي وبعد شهر بدات المشاكل لي كنت خايفة منها اقسم بالله العلي العظيم مادرتلهم والو بالعكس كنت نحوس نرضيهم نطيب ونغسل ونخمل كلش كنت نديره غير باش يرضو عليا وكان زوجي يشكرني وكي نطيب حاجة يقوللهم شفتو مرتي ماكلتها شحال بنينة كل حاجة نديرها يشكرني قدامهم حتى ولاو نحسهم يغيرو خاصة امه
وهدا هو الغلط اللي خلقه بيناتنا صدقوني كنت دايما نقوله ماتهدرش عليا قدامهم وهو ما حبش يفهم وانا لي رحت ضحية بديت نسمع كلام ماشي مليح عليا وامو دايما تقايسني بالكلام وباباه ماتتصوروش واش كان يقولي والله كنت نسكت وندير روحي ماسمعتش وكان زوجي يصبرني ويقولي مابقاش بزاف ونرجعو لدارنا

حتى وحد النهار طلب زوجي مني pus كنت مخبيتهالو ركبها في البورتابل لقاها حبست علاخاطر نسيناها ماكناش نفليكسو فيها
زعف مني وقالي نتي السبب ماكنتيش تحبي تعطيهالي وماركيش دايرا فيا لامان وبقا يسب فيا قدام امه واخواته والله حشمت منهم ولي زاد عليا قاللهم عليا كلام يسم البدن قاللهم بلي انا نبغي الدراهم وموبذرة ونحب نلبس وكل ساع نشري ووو
نقسملكم بربي ماكاينا منها ظلمني وانا مافياش هدا الشي
انا في هديك اللحظة ماقدرتش نتمالك نفسي خاصة كي سمعت امو تقوله الخير مرا والشر مرا وهو زايد في هباله عيطتله دخلنا للشومبرة وقلتله واش بيك عمرك ما تنارفيت عليا وتزيد تظلمني تزايدنا في الكلام وفي لحظة غضب لميت حوايجي وقلتلو نمشي لدارنا سمعنا باباه قالي ايا انا نديك والان راني في دارنا عندي سمانة والله كرهت منهم واللي راها خالعتني زوجي لي كان نعم الزوج كان يعاملني احسن معاملة تبدل بين ليلة ونهار ماعرفتش علاه
وامس عيط لامي قاللها مافقتش بروحي وبنتك مقلشة بزاف
وحب يهدر معايا ماحبيتش نسمعه كرهته على الكلام لي جرحني بيه ومانسمحلهش وقلت لاخته في الهاتف مانرجعش خلاص
ماعرفتش واش ندير قولولي انا لي غالطة ولا زوجي لي شوهلي صورتي قدامهم والله هو انسان طيب ومافهمتش علاش زعف وسبني ولي غايضتني قدام اهله
ماقدرتش نسامحه

طيور الجنان · 2016-01-06, 09:01

اختي ربي يفرج عليك ان شاء الله و المشاكل هاذو يصراو بين اي زوجين استغفري ربي و سامحي راجلك على جال ولادك.

آسيا 25 · 2016-01-06, 09:18

السلام عليكم
اختي كان الله في عونك,انا رايي ان لا تفرطي في زوجك خاصة انك قلت انه كان نعم الزوج لك و تغير فقط منذ انتقلتم الى بيت اهله, و هذا دليل انهم هم من يقوم بتسميم افكاره ضدك, اختي اصبري قليلا و لا تناوليهم مرادهم في دس العداوة بينكما ارجعي و تحلي بالرصانة و الحكمة و احمدي الله انك لن تعيشي كل عمرك معهم بل هي مرحلة مؤقتة فقط و المهم ان زوجك اقر بخطئه.
سلام

محمد جديدي التبسي · 2016-01-06, 09:26

ما عجبكش مدح زوجك لك امام والديه وما عجبكش ذمك امامهم وعملتيلو درس في الغرفة ووالديه يسمعو!!
مادام فترة وترجعي لدارك المفروض راك صبرت أكثر
انت الخاسر الوحيد في هده الحالة خاصة ابنائك لازم تفكري فيهم وترجعي لبيت اهله وديري حدود في التعامل مع والديه ولا تتحسسي كثيرا لانك ستتعبين وحدك!
ربي يفتح عليك ويعيد الاستقرار والسعادة لبيتك..

أم ياسين الزهراء · 2016-01-06, 14:25

حبيت برك نبهك انو صح كلامو جارح وقاسي بصح واش تحبي تعلمنا نتبعو ازواجنا ونعيشو عل جالهم وخاصة اربع ولاد الله يبارك راي تبقاي شوي عند اهلك وتبعدي على عايلة زوجك حتى تهدا النفوس وفي الاخير راح تولي لدارك ادا ماشي على جال روحك ولا عجال زوجك لانك عشتي معاه احلى الايام على جال ولادك ونضن زوجك يمر بحاجة بلاك انت ماتعرفيش ننصحك تهدي نفسك وماتزربيش تتاخدي القرارات والايام كفيلة ترجعكم لبر الامان

ماكيش اول وحدة تصرالها مشكل مع زوجها وماراحش تكوني الاخيرة بصح تربيتنا خلاتنا ننساو واش فات وربي يهنيك اختي

سجل أنا جزائري · 2016-01-06, 14:30

أختي تعوذي بالله من الشيطان و التمسي الأعذار الأنسان تجيه حالات يتبدل فيها بسبب الظروف او مشاكل مبعد يولي كيما كانت

زوجك أكي تعرفيه من قبل تعرفي انو دخل بيناتكم الشيطان حاب يفسد بينتاكم و خاصة كي عاد في دارهم أكيد هو أيضا يتمنى انو مزلتو في داركم و حدكم

ثاني أعتقد عدم صبرك مع أهله هو اللذي جعله يتغير نحوك يتهمك بتفشش و دليل قالك زيدي أصبري ما بقاش بزاف

اذا كان الظروف ما سمحتلوش معليش أصبري معاه و تحملي و حذاري كيما تشكيلو على أهله لأنه سوف يحس بالاهانة حتى و لو كانو صح ظلموك

اذا شفتي مو مبادرة للاصلاح ما ترديهش و تفهمي معاه ما تخلوش الشيطان يفسد بينتاكم هذي الحياة الزوجية لازم نتي تسمحي مرة في حقك و يجي نهار و هو يسمح في حقو و هكذا تمشي الحياة

houssem-bigbos · 2016-01-06, 14:31

ارجعي لدارك اختي والله ما يدوملك غير راجلك و اصبري حتي يفرج ربي و حاولي كيفاش ما تحتكيش معاهم بزاف

fati 17 · 2016-01-06, 14:55

حبيبتي ارجعي لدارك والعني بليس راك قلت عليه مليح وممكن من الضغوطات البر والداخل انفجر اصبري مصيرك ترجعي لدارك وتتهناى كيما قبل ومش اي سبب تخملي قشك راه بيناتكم ميثاق غليظ واربع اولاد

زبدة ذايبة · 2016-01-06, 15:05

لوكان اللي رفدتي فيها روحك لداركم

كنت تروحي لدارك الأولى اللي كنت فيها

فتحت المجال واسع يالحيبية

كلما فتحت المجال للناس كلما ضيقو عليك هذي قاعدة.

ماكاش واحد في الدنيا رايح يحبك قد نفسك

وإذا أهنتيها الناس تردك ............

رحتي برجليك لفم المشاكل

لوكان خليتيه راح يقرا وحدو ويرجعليكم لبيتكم

خير من اللي ترفدي روحك واولادك الله يبارك

تروحو لدار الشيخ !!!!!!!!!!!!!!

اسمحيلي عاودي راجعي تصرفاتك باش واحد مايهينك

مع أننا نتجاوزو على أخطاء أزواجنا في مرات كثيرة.

حاولي الاستفادة من الخطأ مااستطعت حتى تسرجعي قيمتك

أنا لاأشجعك على الطلاق ولا على أن تجعلي من الحبة قبة

لكن حاولي ترجعي قيمتك وكرامتك

فأنت أم لأربعة أبناء وجديرة بأن يحترمك زوجك وأهله.

ام فضل · 2016-01-06, 15:18

ربي يهنيك فكري جيدا في اولادك

ام امير1 · 2016-01-06, 15:28

يا اختي وش نقلك صح البعض مايخافوش ربي الام كي تكون شريرة حقها ماتخليكش تخرجي من الدار و هي لي مغيرة صورتك مع شيخك اصبري الدنيا فيها المشاكل و باه تولي سيي تجي يماه تترجاك هاك تولي بكرامتك

om_nour · 2016-01-06, 15:38

اختى مدام انك ام لاربعة اولاد وعلاه ماتبقايش في دارك

ومرة على مرة يطل عليك واحد من اهلوا ولا اهلك يشوف حاجتكم
احنا اغلب الناس دير هكذا

مرة راح زوجي شهر ستاج وخلالي بنت وولد اكبرهم كان يمكن عشر سنوات مرحت للدارنا ولا دارهم

جبت خويا معايا

ومرة على مرة والديه وابي واختى يزورونا

والحمدلله

القائدة · 2016-01-06, 15:53

اقعدي في دار باباك

بنات الناس ماشي لعبة

و مكيش خديمة عندهم ، راكي زوجة

و احترامك هو واجب عليهم كلهم
خاصة انك تخدميهم و واقفة عليهم وهم لا احترام ولا اعتراف بالجميل ولا حتى مساندة في لحظة ضعف منك !!!!!

ابقي حاليا في دار باباك معززة مكرمة و كي يتوحشك و يتوحش ولادو يجيك لدار باباك

و كي يكمل السطاج تاعو روحوا لداركم

هاذي ماشي دارك باش تكوني ملزمة بالمكوث فيها ! ما هناوش رواحهم يمالا كل واحد يلزم حدو ماشي حلال في بنات الناس و حرام في بناتهم !!! حسبنا الله

خوذي رايي هاذو من كلامك مستقويين عليك و انتي ضعيفة مسيكينة يتلمو على راسك خاصة الشايب انا مافهمتش شايب و مدخل روحو في حديث النسوة ! احترم عالاقل رجولتك و شيبتك ! كنا قبل نلومو على العجايز و تمهبيلهم و اليوم رآنا نشوفو حتى الشياب طلع شانهم و عادو يفيبريو !

القائدة · 2016-01-06, 15:59

اقتباس:

المشاركة الأصلية كتبت بواسطة om_nour

اختى مدام انك ام لاربعة اولاد وعلاه ماتبقايش في دارك

ومرة على مرة يطل عليك واحد من اهلوا ولا اهلك يشوف حاجتكم
احنا اغلب الناس دير هكذا

مرة راح زوجي شهر ستاج وخلالي بنت وولد اكبرهم كان يمكن عشر سنوات مرحت للدارنا ولا دارهم

جبت خويا معايا

ومرة على مرة والديه وابي واختى يزورونا

والحمدلله

الخيار الأمثل والله
بصح هي باين عليها متقدرش على فراقو أو تغير عليه بزاف علاهاذيك رجلها على رجلو .

أم رامي أحمد · 2016-01-06, 16:05

السلا م عليكم يا اختي راكم في زوج خاطئين والخاسر هو انت ما تكبريهاش وارجعي لزوجك انا اعرف اخت عملت وش عملت رفدت حوايجها وبنتا وراحت دار باباها منذ 5 سنين مازالت عندهم لكن باسم مطلقة المسكينة دارت في بالها الكرامة وقعدت تسنى في الزوج يجي يحللها ردي بالك يا ختي في خاطر اولادك انعلي ابليس وعيطي زوجك وطلبي السماح تم رح يعرفك بلي فحلة .الله يهدي النفوس