خبز خفيف وهش كالقطن

أم محمد علي · 2015-08-09, 12:53

سلام عليكم ورحمة الله وبركاته
كيف أحوالكم ؟
إن شاء الله تكونوا بخير وعافية
هذا خبز للأخت ninafret
نشكرها بزاف بزاف ونقولها جزاك الله خيرا يعطيك الصحة .
بداية شفت الخبز وكنت مترددة ثم قررت أني نجربوا ...
بداية بسم الله
في جفنة ضعي 3بيض +نصف كأس زيت +ملعقة كبيرة خميرة الخبز+ ملعقة ونصف كبيرةسكر+20غ ملعقة كبيرة ملح (أنا استعملت ملح بحري لأنه صحي )+2كيسان حليب دافئ (إلا ربع )(الكأس المستعمل كأس إينوكس كما قالت الأخت الفاضلة )+وربع كأس ماء زهروخلطي الكل بالباتوغ مدة 5إلى 7 دقائق أو بيدك عادي.
طفي الباتوغ وضفي 1كيلوا فرينة (أنا استعملت التاس تع لعبار)+1خمارة نوارة (خمارة تع الحلوى)+ملعقة أخرى خميرة الخبز+ملعقة كبيرة نخالة الخبز(صحية ) +السانوج وحبة لحلاوة +وخلطي بواسطة ملعقة خشبية .
في الأخير تتحصلي على عجنة متلاصقة مستحال تمسيها بيدك .
غطيها وخليها تخمر نصف ساعة .
بعد مرور نصف ساعة يكون خمر مليح وتضاعف الحجم .
خذي صينية وأدهنيها بالزبدة (لا تستعملي الزيت في الخبز والبريوش لأنوا باستعمالك الزبدة يتنحى الخبز بسرعة وتبقى الصينية نقية غسلة خفيفة عكس الزيت )وأقسمي العجنة على 2 وأخبزيها في الصينية.أنا خبزت واحدة رقيقة والأخرى خشينة شوية ولكم الإختيار
ملاحظة :استعملي الزيت حتى تقدري تتحكمي فيها أنا استعملت حوالي فنجان صغير.
ضربي حبة بيض كاملة مع قليل من القهوة (سائل)وأدهني الوجه جيدا ورشي بالسانوج وحبة لحلاوة وخليه يخمر مرة ثانية حوالي ربع ساعة
ملاحظة :أشعلي الفرن قبل مرور كل الوقت لأنوا إذا خمر الخبز وتلاحظي تضاعف الحجم ثم تشعلي الفرن راح يزيد الوقت وهذا ماشي في صالحك والبارح جاءت عندنا جارتنا وهي كبيرة في السن 72سنة الله يبارك وسألتها عن السر في خبزها (يجي خفيف من الداخل وبنين )قاتلي متخليش الخمورية تخرجوا لأنوا إذا خرجت الخمورية ميجيش شباب

وملاحظة أخرى أخواتي الخبز يحب النار قاوية نوعا ما متنقصيش للنار بزاف وكل واحدة تعرف الفرن تاعها .
ومتقطعيش الخبز وهو سخون خليه يبرد تماما أنا غير تخرج الصينية نحطها في الأرض حتى تبرد تماما ونقسموا .
هذا الخبز مليح لتكون مريضة أو عيانة لأنوا متعجنيهش
حقيقة جا شباب بزاف في المنظر وتحمر من الفوق ومن الداخل هش وخفيف كما لقطن
واليوم جاو الضياف وراهم يفطروا الآن إن شاء الله يعجبهم
أو مبعد نرجعلكم لخبر واش قالوا ؟
جربوه ومتندموش راه يحمر الوجه سواء جاو الضياف أو رحت أنت
بالتوفيق وراني عاودت شرحت مليح وهذا للمبتدئات وكاين بزاف يخافوا الخبز وميجربوش لهذه الفئة شرحت مليح وأعطيت كل ما نعرف وأناأي شيء نجربوا نكتبوا بإذن الله ورانا خيات نتناصحوا وكل واحدة تكتب تجربتها ونستفادوا .

أختكم فاطمة
وهذا رابط الأخت ربي يحفظها :

حصريا خبز الدار بالفرينة خفيف كي القطن مع غدائي اليوم
ها هي الصورة

ام حمزة22 · 2015-08-09, 13:08

بارك الله فيك وربي يجازيك كل خير
مشكووووووووورة

أم محمد علي · 2015-08-09, 13:10

الله يسلمك أختي جربيه ومتندميش
راكي روطار بزاف

اغادير · 2015-08-09, 13:12

مشكورة.... ويعطيك الصحة

أم محمد علي · 2015-08-12, 19:50

اقتباس:

المشاركة الأصلية كتبت بواسطة اغادير

مشكورة.... ويعطيك الصحة

جزاكم الله خيرا

أم محمد علي · 2015-09-17, 07:31

اقتباس:

المشاركة الأصلية كتبت بواسطة اغادير

مشكورة.... ويعطيك الصحة

آمين
وفيك يبارك الله
وأنتم جزاكم الله خيرا

أم محمد علي · 2015-08-09, 14:31

جزاكم الله خيرا
بارك الله فيك على الرد

ميمي مازوني · 2015-08-10, 16:43

شوفو هذ الوصفة سييتها وخرجلي شباب وصح كما قالت الاخت خبز هشيش و خفيف بصح انا غيرت الوصفة على خاطر انا نعجز أونكره كثرة المقادير الوصفة تاعي ساهلا ماهلا ندو زوج كيسان حليب نخلطو فيهم حبة بيض .ونزيدولهم رطل فرينة أو شوية ملح وو نديرو مغرف خمارة الخبز مع مغرف خميرة الحلوة مع شوية حليب أو نزيدوهم للفرينة و نلمو برك منعجنوش للللللللللللللللللللا ثم لا لا لا لا غير نلمو العجين ونخلوه يخمر ونزلوه 2 مرات من بعد لي يخمر نديروه في سني تاع الكوشة ونديرو ورق الزبدة باش الخبزة متلشسقش. وندهنو الوجه بزبدة أو نخلوها تخمر ومن بعد الى الفرن متشدش الطياب بزاف أو شهية طيبة وادعولي يخليلي راجلي ويصلحلي ولادي

أم محمد علي · 2015-08-11, 12:52

اقتباس:

المشاركة الأصلية كتبت بواسطة ميمي مازوني

شوفو هذ الوصفة سييتها وخرجلي شباب وصح كما قالت الاخت خبز هشيش و خفيف بصح انا غيرت الوصفة على خاطر انا نعجز أونكره كثرة المقادير الوصفة تاعي ساهلا ماهلا ندو زوج كيسان حليب نخلطو فيهم حبة بيض .ونزيدولهم رطل فرينة أو شوية ملح وو نديرو مغرف خمارة الخبز مع مغرف خميرة الحلوة مع شوية حليب أو نزيدوهم للفرينة و نلمو برك منعجنوش للللللللللللللللللللا ثم لا لا لا لا غير نلمو العجين ونخلوه يخمر ونزلوه 2 مرات من بعد لي يخمر نديروه في سني تاع الكوشة ونديرو ورق الزبدة باش الخبزة متلشسقش. وندهنو الوجه بزبدة أو نخلوها تخمر ومن بعد الى الفرن متشدش الطياب بزاف أو شهية طيبة وادعولي يخليلي راجلي ويصلحلي ولادي

ربي يجازيك أختي
يعطيك الصحة
تدهني الوجه بالزبدة وكيفاه يخرج ؟

ميمي مازوني · 2015-08-14, 21:10

سلام يا ام محمد علي بنسبة لسؤالك انا نذوب الزبدة وندهن قاع الخبزة من الفوق واصلا بلا الزبدة الخبزة تلصق في اليد لازم ندهنوها مليح مليح وتكون كميت الزبدة لاباس بيها وتقولي علاه مدرتش الزيت انا نقولك سييتها بزييييييييت وجات يابسة وسيرتو مييييييين تصبح بصح الزبدة تخليها طرية وهشيشة وغادي نديرها دروك للعشاء ونصورهالك