اخ زوجي

[مشكلتي]

تابع للمشكلة الاتية"أخو زوجي" عندها حوالي شهرين:
"""السلام عليكم
مشكلتي تؤرقني كثيرا .انا متزوجة مند أشهر أسكن مع أخ الزوج و زوجته يعني عايلتين في دار وحدة "الدار تاع الوالدين"
باختصار في الاونة الاخيرة أصبح أخ الزوج "هو يخدم في سلك الشرطة" أصبح يضايقنا كتيرا يعسني
واش ندير و يتحسس مني وكي نطيب حاجة مايعجبهش الطياب أو كي نغير ديكور منزل مايعجبهش و يبدا يتمسخر هو عصبي كتيرا الحقيقة انا متجنباتو بصح يرميلنا الهدرة بزاف متلا" راهي تحكم فيه ..." و الله الحمد لله انا وحدة مطيعة و متربية و حاكمة لساني حتى على حقي منعرفش ندافع لكن امام شخص هكدا حرت واش ندير من غير نجي ل غرفتي و نبدا غير نبكي
و كاين حاجة تانية هو الكبير في العايلة مايصرفش نهائيا حتى الما يشري غير ليه وراجلي ماقدرش يوفق بين كل متطلبات البيت راهورامي كلش عليه و يتكل عليه
انصحوني كيفاش نتعامل معاه و مع زوجتو؟؟
هل أخبر والديه بكل أمر باه يكونو على دراية؟؟""""""


يا اخوتي لقد تجاوز أخ زوجي حدوده اصبح يشتمني و يسب ووصل يقول جبناها بونيشة تسكت برك و أيضا يحكي كلام انا ماقولتوش أصلا انا خاطيني و خاطيه من غير سلام برك و مأخرا قال لاختو بلي انا شريت القهوة و السكر و خبيتهم عليه و على مرتو وانا والله أخلاقي متسمحليش ندير هكدا برك الغيرة راهي تحرك فيه اصبح عدو زوجي ماولاوش حتى يسلمو على بعضهم حاولت نصلح بينلتهم لكن هاد الشخص صعيب بزاااااااف حتى والديه يخافو منو وبالرغم من ان غير زوجي يصرف راح قال لخوه فهم روحك شوية ايا جا خوه و قالو انا منصرفش على 02 عايلات
والله كرهلي المعيشة رغم اني متجنباتو الا انو هو يجي ليا والوالدين يخافو منو و زيد قالك مكاش القسمة
مادا أفعل كرهت ساعدوني بحلول

[صهيب المغرور]

اذا امكن اخرجو من الدار و اكريو وحدكم

[ايمان4]

تخرجوا من الدار لكن ديري في بالك هو راه يحوس على هادي تخليله الدار باطل ....
يلا تقدري ترميه ف الثقيل هو يهدر و انت معلابالكش بيه مخلصش الضو مثلا ؟؟ خليوه ينقطع و ريحي فوتي يامات عند والديك بيلاما يتفاهمو و يخلصو النص بالنص ...
تخلي الدر و تخرجي تكري تربحي راحة البال لكن لها عواقب ... يلا تقدرو تفضلو باش تشريو ارض او سكنة ف كاش عمارة و تخرجي نيشان لدارك الماكلة افصلو اشري فريقو حطيه ف بيتك و الطياب افصلو ف كلش مكاش مصروف مشترك كل واحد و عايلته و الضو و الما ما تخلصوش كلش النصف فقط حتى يحن ربي

كاين فرق بيم واحد مليح و كريم و واحد مشموت هذا استغلالي اسمحيلي ..

[غزلانْ]

السلام عليكم

هذا ماجنيته لنفسك بسبب خدمتك لأخ زوجك و زوجته و منذ البداية
اعتاد هو و وزوجته عليك كأنك بونيشة كما قالها لك
تجاهليه لا تردي عليه و لا تخدميه أنتِ ملزمة بخدمة زوجكِ فقط و نقطة
و ما طريقته الاّ لخروجكما من البيت لا غير

بالتوفيق

[الصابرة المجاهدة]

السلام عليكم
اسال الله ان يفرج همك
يا أختي هذا ابتلاء ابتلاك الله بك حتى يعلمك الصبر والحلم
اولا الجئي الى الله بالدعاء واكثري من الاستغفار والصلاة على النبي فهما سببان في تفريج الكرب صلي ركعتين وادعي الله في سجودك ولاتنسي الثلث الاخير من الليل فهو وقت اجابة الدعاء
ثانيا قابلي اسائتهم بالاحسان اليهم لقوله تعالى بسم الله الرحمان الرحيم(ولاتستوي الحسنة ولاالسيئة ادفع بالتي هي أحسن فإذا الذي بينك وبينه عداوة كأنه ولي حميم)

اشكي الى الله فهو القادر على تفريج همك
ولن ينفعك اي مخلوق

[زبدة ذايبة]

يا أختي هذه محاولة حتى يطردكم من البيت اللي راكم فيه

ماعندو حتى طريقة غير هذي

ولوكان جيتي ترديلوا الهدرة لوكان يا حسرااااااااه من اللي خذيتي لعصا من عندو

بالتالي

القضية واضحة

الأضعف هو اللي يستسلم

إذا زوجك يقدر يخرج من الدار يكون أحسن بكثير

لأنك ماراكيش عارفة وش يقدر يدير

التفكير تاعو يروح لبعيد

ممكن يديرلك مشكلة كبيرة وفضايح ماتسلكيش منها

أكثري من الدعاء ومن حسبي الله ونعم الوكيل

إذا زوجك يقدر يخرج يكون أحسن ليكم

وإلا انتقلي اسكني عند الشيخ ولعجوزة

ردي بالك وانتبهي لنفسك مليح

كاين ناس أشرار وشياطين في أجساد بشر

ماتزيديش تخدميهم

وشدي غرفتك كي يجي

وديري جهدك مع زوجك

وماتسكتيش على الإهانة والسبان اللي راكي تسمعي فيهم صباح وعشيا

ماشي قبلتي بهذ الحياة وتزيدي الذل والإهانة من فوق

وماطوليش ويضربك أخ زوجك

راكي باينة رايحة لهذا الشيء

أهدري مع والديك يهدروا مع راجلك يدير موقف ( على حسب ظروفك وانت أدرى في هذا الأمر وإذا كان يناسبك هذا الرأي)

حافظي على نفسك وكرامتك وديري موقف باين وصريح

راجلك كيماشي قادر لو كان بقى بلا زواج كان أحسن

يجيب بنت الناس ويهونها ويمرمدها ويخلي خوه يسبها صباح وعشية !!!!!!!!!!!!!!!

رب يفرج عليك عاجلا غير آجل

[قدور بن عاشور]

على كل حال هذا فقط جزء من القصة و لم نستمع إلى الجزء الآخر و وجهة النظر المقابلة.
المهم، على حسب الرواية تاعك عندك حلين لا ثالث لهم:
1- الخروج من البيت و الكراء و بهذا تشتري راحة بالك و كرامتك بدراهمك و هو أحسن حل.
2- ديري فورنو صغير في غرفتك و طيبي فيهاو اعزلي نفسك عن العائلة.

و إذا ما ساعدوكش هذو الحلول، عليك بالمواجهة،
خلي هذاك البنادم يضربك و اشتكي به و اديه للمحكمة
و الأفضل تزيديلها تهمة التحرش الجنسي خليه يفكها بأسنانو
لأن حيوان كهذا يلزملو حيوان أشرس منه.

[الفراشة الرومانسية]

ربي معاااك

[و بشر الصابرين]

صراحة فكرتيني كي كنت نسكن مع دار شيخي ... قعدت معاهم 3سنين داروني بونيشة عندهم نخدم بعيد على الدار 30 km و كي نجي العشية قبالة للكوزينة و الويكاند ما نحكييييش .. مارانيش حابة نتفكر..
و سلفي كان داير فيا العجب هو توأم تاع زوحي حتى الكلام الفاحش سمعتو صبرت حتى ما قدرتش نزيد و خرجت من الدار و استأجرت بيت رغم أنو امكانياتي ما تسمحش بصح درت القلب و خرحت من الدار ...
صدقيني فالشهر هاداك تلاقيت معاه في مركز تجاري كنت انا و زوجي ، جا يهدر معايا كي لي ما كان والو و من بعد فهمت مع الوقت بلي يماه و اختو المتزوجة اللي كانو يعمرولو في راسو ..
انا ننصحك بحاحة ما تزيديش تخدمي لا عليه لا على مرتو ، كي يكون راجلك فالدار اخرجي و ادا ماكاشو شدي الغرفة تاعك و اقعدي حتى يعيف روحو ، و مادا بيك خلي راجلك يقول لوالديه باه ما يتماداش ، و إذا شفتي بلي خلاص ما حبش يحشم قولي لوالديك و داركم بصح بعد ما تحكي مع راجلك بالاك يلقالك الحل، و كي تشوفيه دخل للدار روحي للغرفة تاعك باه يفهم روحو و حتى مرتو ما تزيديش تحلبيها خلاااص و ادا تقدري احكي لخواتاتو

[nihal159]

صباح الخير، أختي أخ زوجك عصبي و قبيح فهمتها لكن والديه يخافو منو هذي مافهمتهاش؟ هذا فرعون و لا شكون؟ كيما قالولك الأخوة لي قبلي وكلي عليه ربي و حبسي ماتخدميش عليه و على مرتو.

[الفراشة الرومانسية]

رب يفرج عليك عاجلا غير آجل

[zina zizi]

هو راه يدير هكا باس يخرجكم من الدتر لكن اياك و الاستسلام بامكانك مثلا تقسمي يعني كل واحد يطيب وحدو و ياك الدار تاع راجلك و تاعو فزوج معندكم من واش تخافو
احكي لراجلك كلش و حاولي تقنعيه يحكي مع خوه و ايضا يتفاهمو يسلكو كلش بالنص هكدا باه يوفق زوجك و تقدرو تديرو مستقبل لروحكم و لوالدكم مستقبلا
ربي يفرج عليك

[nadine0159]

السلام عليكم ورحمة الله تعالى و بركاته انت من سيضع الحل هنا لديك الكثير من الاختيارات اولها ديري كوزينة تاعك و الثانية لازم تكري و تبعدي اصلا شرعا ماتسكنيش مع اخ زوجك ربما انت تروقينه و يغار من اخيه حاولي تبعدي لانه كاين شياطبن في صورة انسان او ربما هدفه ان يسكنو وحدهم ولازم يكون عدل ف تسديد الفواتير. انا من رايي لازم تلقاي حل في اقرب وقتواو ستندمين لاحقا

[amina 31]

السلام عليكم،
ربي يفرج عليك أختي، ولكن من الأحسن كراء بيت خاص بكما،

[الفراشة الرومانسية]

فرج الله كربك