من الاولى متوسط " مراسلة " الى دخول الجامعة

[life is life]

السلام عليكم اخواني اخواتي الطلبة
ان شاء الله تكونو بخير
ليوم حبيت نحكيلكم على امور تعلمتهم من دراستي بالمراسلة
و كما هو موضح بالعنوان من الاولى متوسط الى ان تحصلت على شهادة البكالوريا و اليوم و الحمد لله راني في الجامعة
حبيت ننصحكم باه ما طيحوش في الأخطاء لي طحت فيها انا
صح كان عاجبني الحال ما راطيت حتى عام
و الحمد لله ربي وفقني و كملت مع المراسلة
لكن الامر لي نعرفه انا و تعرفوه نتوما تاني
و اللي هو " الغش "
انا ما نفتيش و نقوللكم ما تغشوش او الغش حرام و ربي يغفرلنا حتى انا دخلت في موضوع هذا
رغم اني كنت نقرا بجد السنوات الاولى و الناس تنقل مني و بعد ذلك حتى انا رجعت نغش
باختصار لي حبيت نقولو و هو ان المستوى ينزل بزاف و تحصل نهار تجي تفوت الباك
لانو الباك و المراسلة مش كيف كيف فرق كبيييير
انا باه ما نكذبش باك حضرتلو في سمانة مع اني ما كنت فاهمة فيها والو و لولا توفيق الله سبحانه لما تحصلت على البكالوريا
حيث نجحت ب 10.01
و الله ندمت على السنوات اللي غشيت فيهم
مع اني تحصلت على الباك و راني في الجامعة اليوم
لكن كلش يجيك صعب
و خاصة اللغات الاجنبية
بغيتكم ما طيحوش في الغلط تاعي
منذ ان انتقلت الى الاولى ثانوي دخلتها غش لعام كامل ما نهزش لكتاب برك ندخل للمعلام و نحمل الفروض "" لاجل النقطة المستمرة ""
و كي يجي يوم الامتحان ندخل ما فاهمة والو
و طبعا مبعد شغل دير " كوبي كولي "
و نهدرو الصح حتى التصحيح تاع المراسلة مغشوش و عندي معلومات انو التصحيح يصححو كيما يحبو و يريدو سواءا تخدم و لا ما تخدمش
على بيها تلقاو الناجحين كامل يتحصلو على علامات متقاربة
ماكانش كامل لي يجيب 14 او 15 و لا في الاحلام
لكن لي يقرا يقرا لنفسو لحباب
و الله قرايتكم تلقاوها
هذا لي حبيت نوصلهلكم ليوم
باه ما طيحوش في نفس الغلط لي طحت فيه انا و ندمت عليه الى اليوم
ربي يوفقكم
و لي عندو اي استفسار على المراسلة راني هنا

[ExAO]

ما شاء الله
و بخصوص النصيحة ان شاء الله يتقيد بها الجميع

[أيمن شبيطة]

اللهم وفقنا جميعا لما يرضيك ..

[aya ayouya doudou]

نصيحة مليحة ان عندي عامين و انا نقرى بالمراسلة و صح نشوفهم يغشو ومادا بيا مانطيحش في الغلطة هادي و هدا العام تاعي 3 ربي ان شاء الله يوفقني و ننجح شكرا على النصيحة

[مريم مريامة]

وعليكم السلام ورحمة الله وبركاته
يعطيك الصحة غاليتي
كي شاركتينا تجربتك
صح في المراسلة كاين الغش ومحسوب أمر عادي
أما الباك حاجة اخرى كيما قلتي
وبارك الله فيك
وربّي يوفقك في الجامعة
وربي ينوّر دربك

[لاقلاسيار 2014]

ماشاء الله

[jolinar]

ربي يوفقك اختي
حبيت نسقسيك نتي لغات؟
ربي يحفظك اذا كان عندك اي حاجة بخصوص الباك شعبة لغات اجنبية (اسبانية)
ابعثيهالي من فضلك
انتظر ردا

[أبو مجيد]

]ماشاء الله

[life is life]

الله يبارك فيكم خاوتي و الله لا يحرم احد من فرحة النجاح ان شاء الله يااا رب

المشاركة الأصلية كتبت بواسطة jolinar

ربي يوفقك اختي
حبيت نسقسيك نتي لغات؟
ربي يحفظك اذا كان عندك اي حاجة بخصوص الباك شعبة لغات اجنبية (اسبانية)
ابعثيهالي من فضلك
انتظر ردا

لقد اجتزت بكالوريا اداب و فلسفة
تمنيت ان افيدك بشكل جيد و لكن للاسف لا اعرف شيئا في الاسبانية
لكن هناك نصائح عامة و لكل الشعب " مع اني لم اتحصل على معدل يسمح لي بالنصيحة ههه ""
لكن انصحك بالتركيز على المواد التي معاملها اكبر دون الاستخفاف بالمواد الاخرى
فمثلا انا صحيح حضرت للبكالوريا في الوقت بدل الضائع لكن حاولت ان اهتم بالمواد الاساسية
و ركزت على الشريعة ايضا رغم ان معاملها كان 2 لكن لا تستخف باي مادة و لربما كانت هي سبب نجاحي
فاعلى نقاط تحصلت عليها في الشريعة بعد الرياضة طبعا
و ايضا اذا ما استطعت اجتياز bac sport فسيكون الامر مربحا لك
مع اني تعرضت للغش و تحصلت على 16 فقط في الرياضة لكن 6 نقاط اضافية احسن من لا شيء
اعطي لكل نقطة قيمتها
و الرياضيات ايضا "" مع اني لم ادرسها منذ الرابعة متوسط لكن بفضل بعض الفيديوهات للاستاذ نور الدين على الاقل حصلت على 5.5 نقاط
و كنت خائفة من عدم قدرتي على كتابة شيء في تلك المادة

""" طبعا و مع نقاط جيدة في المواد الاساسية سيكون النجاح { بإذن الله } حليفك """ اتمنى لك التوفيق

[abdou.wwe]

بارك الله فيك الاخت على النصائح القيمة وللاسف كلنا فتنا عليها . اريد نصائحك للباك انا هذا العام ساجري باك اداب وفلسفة اتمنى اعطائي نصائح للتحضير والمواد التي يجب العمل فيها ولو امكن اعطائي كشف نقاطك لجميع المواد كا الفلسفة والعربية ...الخ لاعمل بعض المقارنات وشكرا

[hana mima]

ربي يوفقنا

انا هدا العام 2 و هاد عام باك ان شاء الله
ادعولي

[jaber ali]

بارك الله فيكم