الجزء الاخير
طريقة عنايتي بابنتي
بنتي ماشاء الله عليها عمرها اقل من سنة
بما انها صغيرة مازال مادرنالهاش غرفة خاصة
ملابسها دايرتهملها في واحدة كما هادي من 5 ادراج
الدرج الاول حاطة فيه كل مستلزمات حمامها يعني جال دوش بارفان طالك الخ و دايرتهملها في صاك دوتوالات خاصة بيها
الدرج الثاني حاطة فيه ملابسها الداخلية التقاشر التريكوتبووات باليدين و بلاش السليبات السريبتات الصغار تاع الحليب البافوارات
الدرج الثالث ملابس البيت من سراول و جوكينقات و تريكوات و ملابس النوم ايضا
الدرج الرابع دايتلها فيهم ملابس الخروج لي تخرج بيهم
الدرج الاخير دايرتلها فيه سرابت الدوش و الوجه و الراس و الدراوات و الكوفيرطات
و فوقو ايضا مستغلاتو
دايرة فوقو علبة حذاء و حاطة فيها 2 كوش و لانجات و بوماد تاع البيبي و الجلد لي نبدللها فوقو وحاطة ايضا علبة الكوش الكبيرة زوجي يشريلها
العلبة تاع 40 كوش يعني حاطة فوقو علبة الكوش و فوقها علبة الحذاء ان شاء الله تكون الفكرة وصلت
بما اني موظفة فبنتي نحطها عند جداها
فبنتي قفتها لي تديها عند جداها نوجدهالها من الليل
نحطها فيها 3 كوش علبة حليبها تريكوتبو سونمونش و اخر باليدين و سليب سريبتة صغيرة للحليب علبة صغيرة فيها العدس الاحمر باشاديرولها في
البيون بافوار تريكو باليدين مغيرفتها و صبسيها
فالصباح انضيف لقفتها 2 حبات فرماج و 1 بتي سويس دانينو و كل يوم انديرلها نوع باش ماتملش يعني نهار فراز نهار بنان نهار مشماش الخ و
نحطلها ثاني 2 حبات قاطو يا بتي بيمو يا قاطو خاص بالاطفال و هادو نحطهم كامل في صاشي صغير
ماننساش ايضآ البيبرو تاع الماء و تاع لحليب مغليين طبعا ولانجت و بوماد و جلد لي تبدل عليه الكوش
هادي هي قفة بنتي الصغيرة
من قبل كنت موجدة لبنتي صاك دوتوالات صغيرة و مخليتها عند جداها فيها بارفان تاعها طالك حليب البيبي صابونة بيبي قون سريبتة مشط
تارموماتر و سيبوزيتوار ادا جاتها حمى لاقدر الله
بيون بنتي عبارة حبة باطاطا حبة كورجات و حبة زرودية و ندير فيهم مغيرفة عدس احمر كي يطيبو و نجي نرحيهم يانديرلهم ربع حبة صفار بيض
مغلي يا شوية زيت الزيتون و ممكن ايضا نطيب معاهم يا شوية جاج يا شية لحم مرحي
من الليل نوجد لبنتي مونتوها بونيها لي قون تريكو و سروال لي تلبسهم الصباح و صباطها طبعا
تم
ان شاء الله يكون عجبكم موضوعي
( تقرير عن مشاركة سيئة )، و الموجودة أسفل كل مشاركة .
2014-12-02, 09:23
العرض العادي
