تطبيقاتي لأم رامي وأم يونس

[إلهام07]

راني طبقت النيستلي ( حليب مركز ) نتاع أم أنس وتحفة وكأنه مشري من المحلات ولكن أنا أضفت ملعقة صغيرة فاني و زدت 2 ملاعق حليب غبرة على الكيلة :
هنا راهو بعد ما بات في الثلاجة ، شوفو كيفاش ثقيل :

وهنا بعد ماطيبتو في الكوكوط ( هاذي راهي 1/2 الكمية الباقي ضرك نقوللكم وين راح )، راهو فيه حبيبات :

وهنا خفقتو بالمضرب اليدوي ماستعملتش الخلاط الكهربائي ، راهو رجع أملس :


ننصحكم جربوه راهو ساهل واقتصادي و لكن عندي 2 ملاحظات :
* استعملو حليب غبرة ماركة مليحة
* حذاري تفتحو البلارة مباشرة بعد استخراجها من الكوكوط خليوها تبرد مليح حوالي 20د لاخاطر راهو الكاراميل يطول باش يبرد ويبقى يغلي داخل البلارة حوالي 10د ، ضرك نقوللكم وين راح النصف الآخر نتاع الكمية :
فتحت البلارة مباشرة من الكوكوط ماصبرتش وكنت قاعدة وحطيتها في حجري انفجر هاذاك الكاراميل وساح كامل على قشي والله العظيم من صدري حتى أخمص قدمي تطليت بالنستلي و الحمد لله كنت لابسة بيجامة خشينة ما تحرقتش ولكن يدي اللي كنت حاكمة بيها البلارة تحرقت ، هاذي الصورة للترهيب ترددت بزاف نحط الصورة ولا لالا ولكن كي شفت أم رامي شخصيا قالتلي تحرقت بنفس الطريقة وأخت أخرى قلت لازم نحط تحذير :


أيضا طبقت قلب اللوز نتاع أم رامي وجات بنينة وهشوشة تهببل وفي الذوق كيما اللي تتباع ولكن ماعرفتش الكيل جاتني شوية خشينة ، هاذي راهي أول محاولة وإن شاء الله المرة الجاية نتحفها :
راني قدمتها مع شوية نيستلي كنت مستعجلة رايحة نخدم ، هاذي الصورة راهي على 6.30 نتاع الصباح :


نزولا عند رغبة الجميع :
هذا رابط قلب اللوز :
https://www.djelfa.info/vb/showthread...2+%D1%C7%E3%ED
وهذا الرابط نتاع حليب النستلي :
https://www.djelfa.info/vb/showthread.php?t=1221090

سلامي للجميع