الزواج ما ذنبي

[مشكلتي]

انا والله كرهت حياتي مشي حابين يخلوني في حالي كل يوم يسقسو كاش جديد وصلت وين بعثولي ميساجات ويقولولي بايرة ياعباد ربي انا واش ذنبي عندي 24 سنة برك انا راضية بنصيبي علاه ميختونيش تقول قتلت منهم القرايا قاريا وندير كلشي نقدر نديرو علاه حاكة مقبولة من حيث الشكل انا واش ذنبي ياك الرجالة سترو على بنات الطريق كامل وليت منحبش نخرج غير نخرج نسمع كلمات نرجع نشبع بكا في الدار آخر كلام سمعتو كنت في موت ياعباد ربي موت وحدة تقولي ماتقدريش تخدمي رآه التقشف علاه قاع هكا كاين يشوفوك يديرو رواحهم مشفوكش لانو مشي متزوجة خصوصا كي كامل نتاجاتي في لافامي والجيران تزوجو مليت من نظرة الشفقة ليا وكانو معوقة قالبتها غير بكا مقدرتش نزيد نستحمل

[بشـرى]

السلام عليكم أختي
أختي إرضاء الناس غاية لا تدرك ، وكون تعمري راسك بواش يقولو راكي تمرضي برك ، الناس ولات عايشة تعس في بعضاها وكل واحد لاتي بخوه واش دار وواش مدارش،قرا ولا مقراش، تزوج ولا مزال ، وكما ديري مكيش مليحة
ديما حطي في بالك بلي واحد ماهو متهني فالدنيا هذي ،كل واحد ومشاكلو ،وكي تشوفي لمشاكل الناس تعرفي بلي مشكلتك والو ، احمدي ربي راكي بصحتك وواقفة على رجليك ما خصك والو ، مكتوبك يجيك يجيك ، اصبري برك ومتفقديش الامل ، وما يغركش الشيطان وتبعي الطرق الملتوية ، وربي يرزقك الزوج الصالح لي يعوضك ان شاء الله ،،،،

[مجرّد إنسان]

إذا فرغ فؤاد الإنسان من تقوى الله فسيمتلئ بكل ما يعكّر صفوه
عليك بتقوى الله حقّ التقوى
لأنّه هو الذي يقول :
{ وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا }
والرزوج الصالح رزق من الله
فالتقي الله واصبري
وأشغلي نفسك بما ينفعك في دينك ودنياك
وكما قيل : من لم يذق جنة الدنيا لم يذق جنة الآخرة
فاجعلي حياتك جنّة بطاعة الله والتقرب إليه وسيرزقك ربّك بإذنه تعالى زوجا صالحا يعينك على طاعته
وكما قالت الإخت : إرضاء الناس غاية لا تدرك
واعلمي أن كلام الناس لن يضرّك إذا كان ذمًا ولن ينفك إذا كان مدحًا فلا تلتفتي إليه

[ibtihal18]

اختي كيما قاتلك الاخت ارضاء الناس غاية لا تدرك و الناس هذو هوما ما يهناوش حتى يعكرو عليك حياتك و لوكان يصيبو ما يشوفوكش طلع عليك النهار
اختي فالدنيا هذي الزواج ماشي هو كلش و الخدمة ماشي هي كلش الله غالب توجهات الناس ولات مادية و كي تشوفيهم غير ملهوفين يجرو ورا الدنيا و فالاخير يموت ما يدي معاه والو .............عيشي حياتك ختي طيشي كلش ورا ظهرك و سدي وذنيك كلمة دخلت من و وحدة خرجت من .........انا في مثل سنك اختي تزوجت و الحمد لله و قريت الجامعة و الحمد لله لكني رفضت العمل قطعا لان عندي قناعاتي الخاصة بي انا مريحة في حمى ربي و الناس رايحة تمرض لاني ما نخدمش و راح يهبلوني اخدمي اخدمي كي نكتر نقلهم ان شاء الله و اللي في راسي نديرو هذي هي ختي ما تمرضيش روحك و باذن الله رح يجيك نصيبك من زوج صالح مازلتي صغيرة وينك مع اللي فعمرها 30 و 40 سنة و زيد كي تتزوجي في بالك يخلوك في رحمة ربي رح يزيدو يمرضو بيك علاه ماتسسكنيش وحدك علاه ما تروحيش مع راجلك علاه مازال ما حملتيش و هكذا اختي هكذا سيرة الناس
ربي يفرج عليك اختي ما تتقلقي ماوالو و اللي كاتبنا فالجبين نعيشوه
عيدكم مبارك

[Zahra 30]

ربي يفرج راكي عاد صغيرة روحي تعلمي بارمي و عيشي حياتك ما تعمريش راسك بهدرة الناس كوني ناجحة في حياتك

[أم شهد*]

يا اختى علاه راكي معمر راسك بيهم خليهم يضبعو واحدهم وانت متعمريش راسك بهدرتهم 24 مكيش كبير حنونتي و لي راه يعيش فيك من هذو الناس لي يهدرو ميزيدش يعيش ياخي عباد ياخي مش معولين يسقمو

[ROMMEL]

يا اختي الامر لا يستحق ....خليك من كلام الناس لانه لا يقدم و لا يؤخر

[RB59711]

والله راني نشوف في العجب في هاد المجتمع 24 سنة مازالك صغيرة , اختي لي يدير على هدرة الناس يبات يحسب في النجوم اهتمي بروحك وعيشي حياتك . وكلشي بالمكتوب ربي يسهلك .

[malikdz01]

ختي قاطعي الجزائريين تستراحي نصيحة من عندي .....شعب يعيي

[لآلئ الجُمان~]

اصبحنا نعيش بين اناس مجانين فعلا
لا زلتي صغيرة عيشي حياتك و لا تهتمي بكلام الناس
في اي حال متزوجة او عازبة لن يتوقفوا عن الكلام
اصلا لا معنى لكلامهم و اظنه كلام غبي الذي يقولونه لك
اذا بقيتي تستمعي لهم لن يمرض الا انت
فارمي ورائك كل الكلام و امضي قدما

[crnb]

على حسب ماقرات انك ضعيفة شخصية جدا وحساسة لاتفه الامور
الم تعلمي بان الله خلق هذا الكون وجعلنا خلفاء في الارض وقسم الارزاق واعطى لهذا ومنع لهدا واذل هدا وابتلا هذا وهذا كل من حكمته عزا وجلا والزواج والرزق مكتوب في لوح محفوظ قبل ان يخلق الله الارض والسماوات يخمسين الف سنة
انصحك ان تزيلي هذه الافكار والوساوس ولاتعيني الشيطان عليك وبارك الله فيكم

[salem1985]

صبري اختي الناس كامل راهي تعاني في البلاد هادي كي الرجال كي النساء تقول الدنيا فيها غير الزواج انا راني هجرت الناس كامل على جال واش مزال ما تتزوج مزال ما لقيت واش ما قبلت بك والله عبارة تنحت العظم موش اللحم فقط الحمد لله ربي جعلنا صابرين 3 سنوات وانا نحوس على بنت الحلال ما لقيتش خلاص فقدة الامل في الجزائر حلي الوحيد تونس وان شاء الله اوفق وهادي حالت الزولي في الجزائر كي الطفل كي الطفلة

[doba]

ربي يرزقك الزوج الصالح♥

[مجرد عابر سبيل]

انا تفهمتك الخطا مو منك هدا الشي الى متاكد منه الزواج او عدم الزواج هدا قرارك وحدك لانه قرار ياثر على حياتك كل ولن ياثر على المحيطين

بكل احتراماتي لك الناس المحيطة بك ناس جاهلة ومتخلفة يعني افكارخاطئة مئة بالمئة انتي تخيلي معي في يوما ما تتزوجي شخص

لكي ترضينهم فقط شخص لاتعرفي عن ماضيه ولا عن حاضره تخيلي انه كان شخص مو ولد فاميليا وعاطيها غير الحرام والشراب

ومن بعد يلوموك اكثر واكثر , واصبرو ان الله مع الصابرين , الله لن يخيب ظنك هادا الشي ماكد مئة بالمئة ومليار بالمليار ومالا نهاية

هناك اشخاص اعرفهم تزوجو في سن 30 او 40 وهم عايشين حياة سعيدة ماشاء الله والحمد لله

المهم : الحل الوحيد هو تفهمينهم بالمنطق ادا ماسمعوش وقسحو ريوسهم فهميهم باي طريقة اني ماشي هكدا و هكدا

وانصحك بالاستخارة والتقرب من الله لانو ليس من حقي ان انصحك نصيحة كاملة وانا لست في مكانك لكني افهمك

هناك امر اخر :

ان تبكي على كلامهم هدا شيئ خاطئ فقط وكلي عليهم الله - حسبنا الله ونعم الوكيل - كلمة بسيطة لكن مفعولها كبير

فقط لا تدعيلهم بالشر ولا تسبيهم فقط حسبنا الله ونعم الوكيل

وهناك امر اخر ايضا كلمة باير ما معناها ؟؟ وحيد مو متزوج كلمة عادية , هناك بعض الناس مو متزوجين اصلا عايشين الحمد لله لا وجع راس لاا ني والو لكن مع دالك الزواج نصف الدين

بالله عليكي هده حكمة الله من قدر الله الزواج فلمصلحته ومن اجل له في الزواج فمصلحته

تخيلي معي انك تزوجتي شخص مارح ترتاحي معاه مثل المثال الاول وعندها ستقولين ياليتني صبرت على كلامهم وماتزوجته

سأل أحمد بن حنبل حاتم الأصم:

كيف أسلَمُ من الناس؟

فقال: تعطيهم مالك ولا تأخذ مالهم

ويؤذونك ولا تؤذيهم،

وتقضي مصالحهم وتترك مصالحك

وليتك تسلم

يعني مستحيل تسلمين منهم كل شخص له شخص يتكلم عليه ويخرب ليه في راسه

اعجبني كلام احدهم لعله سينفعك وسيسصحح كلام البعض من الفئة هاته :
-----------------------------------------------------
الانسان مو بضاعه عشان يبور

والرزق من الرزاق

مين حكم ان البنت اللي متاخره عن الزواج بسن معين حكم عليها بعدم الزواج

كلام مين لو البشر كلهم يقولون هالشيئ مايهم

لان مابيدهم شيئ

الرزق من الله مو من البشر

لو تبين الرزق اسالي الله من فضله
----------------------------------------------
في امان الله وحفظه

واصبري ثم اصبري وماداراك ما الصبر

[mino 19]

24 مزالك صغيرة اختي
مديريش عليهم والله كو ديري على هدا شعب والله ما ديري تا حاجة فى حياتك
لي بغا يهدر يهدر العام طويل