البرياني الخليجي ...طاجين الزيتون...اللحم المفور ..

[اسمهان79]

ه

السلام عليكم ورحمة الله وبركاته
اليوم وصفات بسيطة نتمنى تعجبكم حبيبات قلبي
البرياني الخليجي

زيتون بطريقتي الخاصة

I

اللحم لمفور والبنة تقتل

دجاج مفورررررررر



بِسْم الله وعلى الله توكلنا
البرياني الخليجي طعمو رااااائع
أولاً خذي الأرز ومن الاحسن بسمتي حطيلو أوراق رند ثوم بودرة ملح فلفل اسود شوية زيت نصف ملعقة صغيرة الهيل كمون افاح او راس الحانوت وتوابل الكاري واذا ما عندكش الكاري ممكن تستعملي التوابل اللي يجو مع إندومي اللي بطعم الكاري يعطوك نفس الطعم خلطي الأرز مع التوابل وخليه ومن جيهة حطي الماء يغلي لما يغلي لوحي الأرز يطيب ومرة على مرة حركيه حتى يدخلو الطياب صفيه وخليه يقطر

في قدرة حطي بصل مقطع شرائح وذبليه في شوية زبدة وزيت حتى يذبل مليح ويتغير لونو ثم اضيفيلو (هنا اختياري تحبي تعمليه بشرائح اللحم او شرائح الدجاج او خليط من الاثنين ) بعد ما تضيفي اللحم او الدجاج واللي لازم يكونو مقطعين قطع صغار قليهم مليح مع البصل ثم اضيفي الملح الفلفل الأسود زنجبيل مطحون توابل الكاري الهيل مرحي كمون افاح ثوم مرحي وخلطي مليح ثم ملعقة صغيرة موطارد وقلي مليح ثم حبة طماطم مرابيا من الجهة الرقيقة وهريسة خلطي مليح ثم امرقي بالماء وخلي اللحم يطيب

كي تشوفي اللحم طاب زيديلو نصف كاس حليب نواد كوكو اذا توفر عندك

واذا ما كاش راهي الاخت الهام بارك الله فيها حاطة طريقة صنعو وهاذا هو الرابط

https://www.djelfa.info/vb/showthread.php?t=1580204

بعد ما تضيفي حليب نواد كوكو أضيفي ايضا نصف كاس كرام فراش سائلة ودبشة مقطعة وحركي شوية ثم نحي من على النار
فرغي المرق في مول اي مول عندك ممكن مول كيما اللي عملت انا اللي يتفتح على الجانب او مول دائري

ثم فرغي الأرز على الخليط واضغطي غير بالشوية غطي بورق الالمنيوم ثم الى الفور تقريباً ساعة

كي تشوفيه نشف اقلبيه في صحن التقديم وتمتعي بألذ برياني السر في البنة نتاعو هم التوابل خاصة الهيل والكاري ما نقدروش نستغناو عليهم
طاجين الزيتون بطريقتي

في قدر حطي قطع الدجاج بصل ثوم زيت ملح فلفل اسود افاح زنجبيل مرحي ملعقة صغيرة فرينة معدنوس قلي كلش مع بعض على نار ذليلة ثم امرقي وخلي الدجاج يطيب

في هاذ الوقت تكوني تغلي في الزيتون الأخضر مع شريحة ليمون وخميرة نتاع القاطو السر هنا إنّو لخيرة راح طيبو مليح يجي يذوب في الفم كل مرة تبدليلو الماء واكيد تزيدي شوية خميرة نتاع القاطو واذا عندك وقت بيتيه في الماء البارد مع لخميرة نتاع القاطو ليلة كاملة راح تلقاي الملح نتاعو راح كلو ثم قليه في الزبدة والزيت حتى يتغير لونو و تحسّيه تشرب كل الزبدة

نحيه ولوحيه يطيب مع الدجاج وفي هاذيك المقلة قلي الفطر نتاعك مع شوية فلفل اسود وثوم بودرة قليه مليح
في هاذ الوقت ارحي طرف من صدر الدجاج وزيديلو شوية ملح فلفل اسود القليل من لاموطارد زنجبيل ثوم خلطي مليح
ثم أضيفي حبة جزر مرابيا ومعدنوس مقطع خلطي وشكلي كريات وفي كل كرية حطي شوية فرماج و اغلقي
من بعد اقليهم

اذا عندك وقت نحي شوية من الدجاج المرحي واحشي بيه حبات الزيتون قبل ما تقليهم في الزبدة راه يجي توووووووب

هنا ليبولات نتاع الدجاج راهم واجدين والفطر وعملت أيضاً أعشاش بالبطاطا لزوم التزين وبقاتلي شوية بطاطا مرابياخليتها نخثر بيها المرق

نحي الدجاج نتاعك حمريه في شوية زيت ولوحي ليبولات والبطاطا لمرابيا والفطر مع الزيتون وخليهم يطيبو حتى يخثارو
قدميه بالصحة والهناء مع عصرة ليمون وشوية معدنوس الله الله يهبل راهي طريقة بنينة وفي نفس الوقت بريزونتابل

متعودة ندير معاه شوية اعواد كرافس مقطعين لكن اليوم ماكانش عندي

اللحم لمفور

خذي هبرات نتاع لحم خروف حطيهم في حاجة غامقة

ضعي عليهم ملح فلفل اسود فلفل احمر زنجبيل لفاح شوية خل هريسة وشوية طماطم مصبرة ثوم زيتون اخضر مقطع حلقات حبة طماطم مقطعة مكعبات دبشة مقطعة راس فلفل حار مقطع رقيق شوية زيت ثم خلطي مليح مليح بيدك حتى تتداخل المكونات في اللحم غطيه وخليه يبات في الثلاجة في الغد خذي ورق الالمنيوم في كل قطعة حطي طرف لحم ومعاه شوية من الزيتون والطماطم اللي مخلطة معاه اغلقي الالمنيوم لكن الى فوق وزيدي طرف واحد اخر وديما اغلقي لفوق باه لاصوص ما تخرجش

ملاحظة الاخت ام الاء ولهتني لحاجة هو انك تحطي ورق الشفاف ثم ورق الالمنيون لانهم يقوو انو فيه خطورة يعلم ربي انا هنا ما عملتوش لاني كنت عملتو وخلصت قبل ما نشوف موضوعها بارك الله فيكي اختي ام الاء وجزاكي الله كل الخير عمري البرمة نتاعك بالماء وحطي قطع اللحم في كسكاس ثم غطي بورق الشفاف وحطي الغطاء نتاع الكسكاس وحطي البرمة على النار راه يطيب مدة 4 ساعات ( النار ما تكونش قاوية بزاف)


من جيهة قشري حبات بطاطا وقطعي دوائر ثم هلالات كيما في الصورة اقليهم مليح ثم لصقي كل زوج بالفرماج الطري حطيهم في مول نتاع الفور بعد ما يطيب اللحم افتحي عليه وفرغي لاصوص اللي هبطت منو فوق البطاطا ولوحيها في الفور تتحمر شوية وتاخذ بنة لاصوص

واللحم عاودي اقفلي عليه ورجعيه للكسكاس ونقصي للنار باه يبقى سخون
قدميهم مع بعض اللحم ما نقدرش نوصفلك البنة نتاعو روعةةةةةةةةة روعةةةةةةةةة ويذوب في الفم ومن الاحسن يتكل سخون راهووووووو ما يتشبعش شوفي طراوتو

والبطاطا نفس الشيئ والله جربوه وعلى ضمانتي مش رايحين تندمو
الدجاج لمفورنفس الطريقة فقط نستعمل الليمون مكان الخل ونعمل لاموطارد ومغرفة صغيرة فرينة وتبعي نفس الخطوات
لما يطيب تحبي تقدميه هكذاك



او تنحي الالمنيوم وتحمريه شوية والطعم روعةةةةةةةةة روعةةةةةةةةةة


نتمنى جربوهم ويعجبوكم
في أمان الله حبيباتي

[ملاك ملاكي]

ماشاء الله تبارك الرحمان
الله يغطيك الف الف عافية تسلم ايديك ماشاء الله
يعطيك الصحة يا الشاطرة نتاعنا استاذتي والله خمسة وخموس عليك
ربي يعطيك صحتك ويجفظك ويبقي عليك الستر ان شاء الله
موفقة اختي دائما متالقة تبارك الله
مشكورة بربي نجربه ونردلك بالخبر
الله يجازيك ويحفظك
في امان الله

[amel fatma]

يعطيك الصحة اختي الله يبارك كلشي 4444444444444444444444444

[الاء هبة الرحمان]

ماشاء الله اطباق فى القمة ربى يبارك فيك وفى عايلتك

[فاطمة*]

امممم أختي اسمهان يشهي كل طبق يقول للاخر بعد من الطريق يعطيك الصحة ويسلمو ايديك كل وصفات روعة ماشاء الله.

[ام عبدو و ملاك]

روععععععة روعة اطباقك كلها ما شاء الله يعيك الصحة

[باسم وبيسان]

امممممممممممممممممممممممممم والله اسمهان وبدون مجاملة كل اطباقة تعجبنى وعند طريقة مميز فى التقديم ربى يهنيك

[ام هاديل وياسين]

يعطيك الصحة اسمهان اطباقك تشهي رايحة نجرب المفور ان شاء الله
بارك الله فيك

[انتصار فاطنة]

اطباقك ديما مميزة ربي يشفيك

[دائمة الحمد]

لم اجد تعليق يوفيك حقك في الابداع والتفنن
مبدعة حقا
والابداع درجات وانت بلغت الذروة

[حبيبة امها]

بارك اله فيك أختاه وجزيتي كل خير على مواضيعك القيمة تستاهلي كل الشكر والتقدير
سؤال لو سمحتي لما تعملي البرياني بحليب جوز الهند تدوقي رائحته فيها ولا لا لأنني للأسف لست من عشاقه لكن شكله شهاني

[um alaa]

بارك الله فيكي حبيبتي والله يعجز اللسان عن التعليق كلمة مبدعة قليلة عليكي جزاكي الله كل خير ان شاء الله

[oum islem]

ماشاء الله عليك وعلى طياباتك اسمهان
روعة حبيبتي
تستاهلي التثبيت مش التقييم فقط
شكرا لك على كل ما تقدمين

[بسمة2003]

روعة روعة روعة الله يبارك عندك ام ديتي دعاوي الخير
وشكراااا على طريقة الزيتون عندي ضياف وحارتلي واش ندير مميزة كي العادة

[القناعة كنز]

الله يبارك اممممممم