جلد الخروف ساعدونى

[oumbissen]

جلد الخروف ساعدوني

اخواتى اريد نزع الصوف من على جلد الخروف لعمل حشوات اللمخدات فهل منكم من تعرف كيف ?????????????

[سمسة1988]

حاجة ساهلة
بعد ما تغسلي الهيدورة ديري الجلد للداخل والصوف للخارج ولميها على شكل كرة وديريها في مكان دافيء خلال اسبوع تولي الصوف تنتزع من الجلد
صح تولي ريحتها مش مليحة لكن متخافيش بمجرد ما تغسليها خلاص

[ivaoran]

السلام عليكم
الامر سهل للغاية

هذه العملية حنا نسموها
(نخنزو البطانة) حاشاكم هههه

غسلي البطانة تاعك نقيها نورمال و خليها تقطر
و امي دايما تقوللنا انفضوها
اذن ننفضوها و نلموها بحيث
الصوف يكون مالداخل و الجلد من برا
و ديريها في صاشيا كبيرا تاع بوبال

و ديريها في بلاصة متروكة على خاطر تطلق ريحة خانزة
بعد فترة اسبوع او اكثر البطانة تولي تتنسل
بمعنى الصوف يولي ينقلع وحده

و من بعد غسلي الصوف تاعك و نقيها
نشريها و كي تنشف بشميها و ديريها في المخاد

ارجو اني تمكنت من افادتك

[oumbissen]

merci 3tik alsaha...........

[مايا لين]

كاين طريقة فعالة جدا و مجربة بدون رائحة
اعجني الاسمنت ( او الجير اذا ماهيش متوفرة) و ادهنيها على الجلد مليح حاولي طبقيه بدون ما تقيسي الصوف ديريه في شكارة
خليه نصف نهار و لا نهار كامل كي ترجعيلو تلقاي الصوف يتنحا بسهولة .

[هاجر 76]

سلام اخواتى جاتك صعيبة ديرى كيما قالتلك الاخت مايا مكانش كيما الجير رشيه مليح على البطانة ماشي على الصوف وستناي ليلة وليلتين وشوفى خف خف ينزعلك الصوف حنا كاع نديرو عدى العملية

[saida01]

السلام عليكم ليس هذه الاعمليات انفع ولكن عندي لكي طريقة سهلة ومريحة وسريعة وهي تضعي الماء في اناء كبير حتى يغلي ثم اثنان يحكموا الجلد و واحدة تنزع الصوف اي تضعين الصوف للاعلى والجلد مقابل البخار ثم تبدئي بالنزع لا رائحة ولا اسبوع ولا جير ولا ملح ولا شيء احنا هكذا فعلنا في العيد وامي غسلت الصوف وقريب تشيح

[oum ali khalifa]

Diri eljir rahi tarika madmouna wmataabakche rana mjarbinha

[بسمة محبة]

السلام عليكم أخواتي طرقكم كلها صحيحة لكنها تأخذ وقت حنا عندنا طريقة أخرى و سهلة و لا رائحة ولا أسبوع
في يوم العيد بعد مانخلصو كل شيء و مايكونش الضياف نروحو للكوزينة و 2 يحكموها يعني الجلد و يحطوه فوق النار مالازمش يلامسها غير يوصلو الحرارة ان شاء الله تكونو فهمتوني كيما الأخت لي قالت على البخار لكن حنا على النار مباشرة و لما يبدا يسخن وحدو أخرى من فوق تبدأ تنزع الصوف بالجيهة مجرد 10 د تكوني تهنيتي منها

ملاحظة لازم تلبسوا طابليات باش ماتوسخيش قشك جديد و مافيهاش حتى رائحة متلصقش فيك.

ان شاء الله العيد الجاي تجربوها و رح تخرجلكم نتيجة رائعة.

[بسمة امل الجزائر]

جزاك الله خيرا

[archioui]

salam ,
hna ndirou javel fi placet el jir
c efficace aussi

[ام رونق]

اختي صح عيدك معليش جت متاخرة بصح معليش ديري جافيل براف هو احسن طريقة باش تنحي الصوف من غير روائح كريهة صبيه على الجلد الجهة الي مافيهاش الصوف بلا ما تزيديه الماء لازم يكون الجافيل نتاعك قاوي لذلك ننصحك ببراف وخليه ساعتين تلقي الصوف تتنزع بكل سهولة انشاء الله تجربوها العيد الجاي وتقولولي على النتيجة سلام

[الاء هبة الرحمان]

الطرق تاعكم كامل مليحة وتعلمنا معاكم معلومات جديدة نزيدلكم انا وحدة كيكون الجلد هاكاك سخون رشى عليه خميرة الخبز واطويه ساعتين ترجعيلو تلقاى الصوف تتنحا بسهولة

[سونا31]

السلام عليكم اختي الكريمة نحنا نزعنا صوف الجلد بطريقة جديدة وسهلة جدا قمنا بتسخين الجلد على النار لازم يكون الصوف من الجهة العلوية ثم نقوم بتدوير الجلد على النار وبعد ان يسخن جييدا قومي بنزع الصوف بسهولة تامة يجب ان يمسك معك شخص اخر او شخصين كرري العملية حتى ينتهي كامل الصوف من الجلد اتمني ان تجربيها احسن من العمليات القديمة
بالتوفيق ان شاء الله

[سَلْسَبِيّلْ]

والله تعلمنا معاكم طرق سهلة وسريعة مشكورات