خبراء مقروط الكوشة يساعدوني رجاءا

[2009loulia]

السلام عليكم و رحمة الله تعالى و بركاته

حبيباتي و أخواتي صح رمضانكم

رجاءا عندي مشكل في مقروط الكوشة أنو التمر يتنفخ في الكوشة و يكسرلي الحبة من فوق يعني يعمللي خط و كأنو حاب ينفجر

كل ما نديرو يعملهالي و نعششي نحتم فيه وحدي

ماعرفتش علاه راني نعجنو بالزيت و ماء زهر كما معروف لكن ماعنديش مقدار يعني نطريه كما النقاش

اللى تعرف تساعدني رجاءا حابة نديرو في هاذ العيد ربي يتقبل منا و منكم

[ام رضوان]

السلام عليكم
شوفي اختي بالنسبة للوصفة كاين تاع ام اماني تبعيها راح يخرجلك هايل باذن الله
وكاين تاع اسمهان ثاني وصفة ناجحة باذن الله
اما بالنسبة للغرس
المشكل راحو في التبلال يعني المقروط تاعك مادرتيلوش كمية الماء الكافية
بلي قيس حربوش صغير وبليه مليح وطيبه وشوفي
وباذن الله ماراحش يتحل
اتمنى لك التوفيق.

[محتاجة لعفو الله]

شوفي اختي ما عليك و على مقروط أم اماني رووووووعة بالنسبة لي هي أحسن عجينة مقروط جربتها في حياتي و مقاديرها مضبوطة يعني تعملي العجينة على جيه ما تبقايش تبللي بالشوية ولا بالحربوش و ما تتشققش كامل و ما تنحلش
https://www.djelfa.info/vb/showthread.php?t=1175289

[Halouma20]

السلام عليكم رحمة الله تعالى وبركاته
انا هدا المقروط يجيني مليح و ناجح بادن الله ليوم درته موالفة نديره وهدي الوصفة من عند ماما والله يجيك شباب و مليح بزاف
المقادير :
3كيلات سميد (مولة )تقابلها كيلة سمن دايبة( و ننصحك بالمرجان مليح) و ديري نصف كيلة فرينة و نصف كيلة زيت .
تخليه يبات ليلة وتبغي تخدميه صباح ولا اي وقت .
مقادير الحشو:
تمر (حميرة)تنقيه وتفوريه
كبابة مطحونة
قرفة مطحونة
و هادو على حساب الدوق
و ديري شوية سمن و شوية زيت
بالنسبة للعجين تلميه بالماء و ماء الزهر
و يطيب فلفور بصح يشد منك الوقت يعني من الاحسن تخليه يطيب على هواه في خاطره ياش ما يجيكش معجن
ان شاء الله ينجح معاك
ادعيلي ننجح فالباك

[لجين وفاء]

العرس طريه مليح حتى كي توضعي اصبعك فيه يدخل بكل سهولة
العجينة بليها مليح كيما قالتلك الأخت ماتخليهاش ناشفة راهي تتشققلك والسلام

[2009loulia]

أم رضوان، محتاجة لعفو الله، لجين جزاكم اللخ خيرا كثيرا

و حلومة ربي ينجحك يا ربي و بمعدل كبير