[نان كيومي]

في السنة الاولى من دراستي صعدت للسنة الثانية بشق الانفس كيما يقولو بدعاوي الوالدين .... حكمني شوك وليت خايفة ملا قريت و كنت اجور ....واش درت ...نركز مليح مليح مليح في الدرس في هاذيك الحصة و نحاول نفهم و اكبر نقطة و اهمها و لي ناس قاع ما يديروهاش انهم ما يسقسوش .... وليت نسقسي على كل حاجة و الاساتذة كاين لي يفهمك عادي و كاين لي شوية يبهدل بصح هكاك وما حبستش
ثانيا ندير ملخصات .... ما نحفظش من الكايي ديراكت جامي حبسيها الا راكي يريها عاودي اكتبي من الزيرو باسكو هكاك تتغرس في راسك و تلقاي روحك شديي غير الاهم + ارسمي و لوني جامي تشدي غير في ستيلو زرق ولا كحل ...مقلمتي قاع الوان و ستيلوات من كل الالوان ... و خوذيها مني عن تجربة
ثالثا علمي روحك تقعدي تقابلي الورقة ولا الكاي ... ما تتكايش في الفراش و تقراي غلطة كبيرة لازم ديما بيرو ولا طابلة .... اقراي وحدك مام يكونو عندك صحاباتك قاريين اقراي وحدك من بعد سقسيهم اذا ما فهمتيش مور ما تكوني حاولتي وحدك ..... ديري في بالك بلي باش تقعدي قدام الكايي هي الحاجة الصعيبة سيفي على روحك تقعدي 5 دقايق مركزة و كي يخلاصو قولي 5 دقايق وحدوخرين مشي بزاف زعما انا م نقدرلهومش و كي يخلاصو زيدي قولي هكاك حتى تلقاي روحك قعدي مركزة سوايع و سوايع
اتفرجي الدروس في اليوتيوب وشوفي فيديوهات الشرح .... وديري رياضة ولو في الدار راح ترجعك ما تتفينينيش و ربي يكون معاك