السلام عليكم و رحمة الله تعالى و بركاته
اليوم رايحة نقدملكم وصفة الشريك الي نقدموه مع السماط في الأعراس القسنطينية.
الشريك عادة نعملوه بالدقيق رطب ، و معندوش كيل يعني نخدموه بالعين فقط ، لكن في هذه الوصفة راني كيلت باش الأخوات كي يجربوه يجيهوم ساهل ، على هذا راني خلطت معاه الفرينة ، تبعوا معيا:
نصف كيلو دقيق عادي + نصف كيلو فرينة + ملح + كأس غير ربع سكر حرش +نصف كأس زيت + 4 م ك خميرة خبز + 2 بيض + 2 بياض ( الأصفر نحتفظ به باش ندهن) + حليب دافئ + ماء ورد.
نخلط المقادير كيما نعملو خبز الدار و نبل بشوية ماء ورد و نكمل بالحليب دافئ حتى نتحصل على عجينة طرية ،نغطيها و نخليها تطلع.
نعجن مليح ومن بعد نولي نسقيه بخليط الحليب و الزبدة ( أو سمن أو حتى مارغرين التوريق) حتى نتحصل على عجينة تلصق في اليدين .
ندهن صينية الفرن بالزيت ، وندهن اليدين أيضا و نلوز الشريك حبات صغار بحجم حبة التريدة و نخليه يطلع حوالي ساعة و ممكن أكثر ثم ندهن بصفار البيض + الحليب و نرش الجلجلانية و نحطو يطيب ( طبعا الفرن يكون مسخن مسبقا)
مايديش وقت الطويل كي تشمي الريحة خلاص راه طاب (أنا الفرن تاعي يطيبلي الخبز بلا ما نشعل من فوق)
طبعا كل وحدة تعرف الفرن تاعها ، إن شاء الله تجربوه و تنجحوا فيه لأنه فعلا لذيذ.
سلامي للجميع