انا ماعلقتش على التارت نتاعك في قسم واش طيبتي اليوم حتى نشوف ونفهم التارت هاذي واش قصتها ههههه ( تعرفيني قرعاجة من الكبار هههه ) وصراحة مانحبش نحط تعليق نتاع مجاملة ، غير لكان عجبتني صح الحاجة
والله طحتيلي على القلب أم محمد تاج بهاذي الوصفة ، انا نموت على لي تارت هاذو الباردين راني إنسانة لا تتحمل الحر بتاتا تصوري هاذو الأيام راني نتحس روحي في أوت ههههه مالا نحب بزاف لحوايج هاذو اللي يتبردو بيهم في الصيف راني موجدة قائمة نتاع عصائر و تحليات باردة للصيف وخاصة رمضان باش نتبرد بيهم تقولي داخلة على حرب 
مالا التارت نتاعك كي عادت جامدة وماتفسدش ندير منها ونعود نجيبها معايا هنا للخدمة و نحطها في الثلاجة نتاعي ونتبرد على راحتي هههههه
ماتعرفيش قداش عاونتيني بالوصفة هاذي ، الوصفات اللي عندي كيما نتاع ام كوثر مانقدرش نديرها ونجيبها معايا للخدمة فيها الكريمة بزاف تفسد بصح نتاعك حاكمة روحها ، شكرا حبيبتي راكي في القائمة الحمراء هههههه