السلام عليكم أخواتي اليوم درت تليتلي جا ذوقو راااائع... في طنجرة قطعي البصل+ أطراف الجاج +ملح وفلفل أسود+ شوية قرفة مغرف سمن أوزيت وخليهم يتقلاو على مهل.... من جهة أخرى نحمص التليتلي في مقلاة على نار هادئة حتى يصبح لونه ذهبي ننزعه من المقلاة و نرشه بالماء ( في500غ حوالي نص كاس) كي يشرب نديرو يفور في كسكاس ونغطيه بالمغطة نرجع للطنجرة كي يتقلى نضيف نص حبة طماطم (من غير مانرحيها أو نقطعها) نزيد نحط حبة لفت كاملة... ملاحظة: اللفت والطماطم للنكهة ما نحطهمش وقت التقديم... قليهم شوية ثم مرقي وخليه يطيب.... بالنسبة للتليتلي بعدما يفور نحيه من الكسكاس ديريلو مغرف صغيرة ملح وشوية زيت زيتون ورشيه بشوية ماء، حركي وخليه يتشرب... من جهة أخرى نوجد كرات الكفتة: أنا استعملت لحم مرحي مع دجاج أو اسكالوب مرحي درتلهم شوية بصل مع3 سنات ثوم مع خبز يابس مطحون la chapelure ملح،فلفل أسود، قرفة، جوزة الطيب... أعليهم كرات و حمريهم في شوية زبدة في المقلاة .... كي يتحمرو نديرهم في الطنجرة ونحي قطع الدجاج باش نحمرهم وحدهم.... ونزيد نقطع قرعة بالطول ونضيفها للطنجرة ونضيف راس فلفل أخضر حار بلا ما تتقبيه يطلق بنة هايلة... وخليه يطيب هنا نضيف التليتلي إلى الطنجرة يطبخ شوية ونطفي.. وعند التقديم نضع كلش في الطبق ونحط أطراف الدجاج اللي حمرتهم من فوق