حسراه على صحابي
حسراه على صحابي عادو رجالة .... و ضحكوا عني اليوم عدت فالس
ولد الميعاد و الكرم عاد مع الدلالة ... و عارفين الدنيا مطلعة المرخس
وماك عارف واش من حكمة في شعالة .... و اللي تعرفو اليوم أنا لوحتو يامس
وين جاي مركوبك في وسط الخيالة ... الراكب فوق بهيم عند الرجال موش فارس
حقرت العباد عند ربي تبقى مسالة ... الدنيا بعيبها ماكش عارف وين تحبس
و شوف واش من آية تحت البسملة ... و اللي ظالم خوه في لاخرة يخلص
ما حقرنا فقير ما ضحكنا عللي جوهالة .... ولا جزعنا من خلق الله واش تلبس
سول عني تجار ورقلة واللي موالة ... تعرفني حوست الدنيا مع الرجال فالس
أنت كسبت خمس ملايين راسمال زمالة ... وتعيب عالسجرة ثمارها حلو ماش قارس
و ماخرجتش من ورقلة حتى لضهرة ملالة ... طول تكذب عالناس في معيشتك تمرخس
انت هز الكلام عند العقالة .... و شوف كاش تلقى فيه حرف ناقص
و خليك من جماعة الحسد واللي بخالة ...و كان ضاقت روحك بكلام بلخير غير تونس
أنت عالنفوس ماكش داير وكالة .... هاذا خلق الله في ملكو يحوس
وهاذ العباد ماهي مهملة ... وكل واحد في كتابو عساس موش ناعس
بالاك تامن الدنيا لكان عطاتك دالة .... و دير الخير يا عبد الله و اعرف وين تعفس
راه يجي نهار اللي تعطيك الإستقالة .... ياك شفت ربيع الصحراء وليه وقت ييبس
بين الحق و الباطل ياك كاين زمالة .... و ساكنة وسط عضاك لوكان فالبحر تغطس
الشاكي بلاشهود ما تجيب حقو عدالة ... فوق راس الثعبان وين اوعل يقنطس
حشمتك يالله بجاه مول الرسالة ... ياك الشاعر ماللوط كي نحل يقرطس