حكمة اليوم...
المية متجريش في العالي...
ابعد عني وسيبني في حالي...
انا غلبان انا وامي وابويا...
وجدي وعمي وخالتي وخالي...
محناش بني ادمين يا اخينا...
إحنا يادوب صراصير وسحالي...
إحنا ياباشا ملناش قيمة....
إحنا في إيد أسيادنا تسالي...
جينا الدنيا عشان بوشوشنا...
نمسح جزمة سيدنا الوالي... إ
قابل اني اعيشها موطي...
علشان رزقي ورزق عيالي...
بالأمر اضحك بالأمر ابكي...
يعني كأاني إنسان آلي...
مش مسموح حتى في أاحلامي...
إني أحلم بالأكل الغالي...
ويعيش لينا الفول الضاني...
ويعيش المش العجالي...
والعمر بيتسرسب مني...
وانا عايش مش واخد بالي...
وليالي تجرجر أيام...
والأيام بتجر ليالي...
والضحكة من القلب بعيدة...
علشان عايزة البال الخالي...
جوة بلادي لكن براها...
تخرب او تعمر انا مالي...
والناس بيقولوا إني أتحرر...
أتحرر وأكسر اغلالي...
إزاي اجري ورا الحرية...
وأنا عايش مقهور طوالي...
عبد جنيه أو عبد عصاية...
دايما عبد رئيسنا الحالي...
وباصدق كل إلي يقوله...
مهما يكون كذاب وضلالي...
عبد الكرباج إلي بينزل...
على جسمي وأجسام أمثالي...
وشقيق واحد زي حالاتي...
ليل ونهار يصرخ ويلالي...
والعيشة اللي بنسمع عنها...
مش ممكن تخطر على بالي...
ليل ونهار بنده ع الموت...
تفرق ايه رحت له أو جالي...
دا أنا لو قالوا فلان اتوفى....
بتبسم واقول عقبالي...
مين يا صحابي يشتري أيامي؟...
مين يقبل ويعيشها بدالي!!