أصبر يا قلبي ومرضك ما يبطاش ... و بعد الظلمة راه يطلعلك لقمر
و حتى الزاوش ما يطَول في لعشاش ... وبعد أيام ينبت الجنحين يفر
و حتى واحد ما طمع فالدنيا عاش ... و نهارو محدود عنوا مايجور
و رانا شفنا اللي توفى وما ولاش ... ياويح اللي خاذ مالشينة والشر
لاحظ فعلك يابنادم ما تنساش ... وقت رقودك زيد شهد و أستغفر
و هاذي دنيا راحلة ما تمنهاش .... و احرز روحك بيبان راك مسكر
و هاذي هي حالة الدنيا كيفاش ... و خلقها ربي منام و ما يتفسر
و هاذ الوقت صعيب وعنو ما طقناش ... و غلبنا دالجيل ماعندوش قدر
ياك الحق اليوم ولى مايسواش ... و الباطل زادوه قيمة كي تشهر
روح تسقسي واش باقي ماتلقاش ... ناس قبيل غداو و غطاهم لحجر
كانت خيمة فالصحاري و أهل الشاش ... و السرج يحطوه للغزوة البر
وتلقى البدويات بقدرهم كيفاش ... طبع الصحراء فرضهم ما يتودر
و الضيف يحبوه يدهم و مايغداش ... من خفة ليدين ماكلتو تحضر
و كلمتهم ناقصة ما تسمعهاش ... محترمين رجالهم فيهم تقهر
هاذوا هوما اماتنا بكري كيفاش ... وحدة بالحفى و وحدة بالشر
و لحق هاذ الجيل بفعالو غشاش ... ناسي ذكر الله يخدم فالمنكر
كي تتزوج يا بنادم ما تهناش ... تتصبح مغلوب و أنتايا تفخر
وبنت العكلي نفهمك ما تديهاش ... يوم الداوسها ميمتها تنعر
و تلقى المخلوق بوها الموسطاش ... يبرق عينيه في نسيبو يتعنتر
توصيها على امك ما تنفعهاش ... يا مربوط الراس لازم تتفكر
و البي اللي كان يتصبح قرداش ... تعورلك فيه ذي الشيب يمنكر
تصبح تشري في عقاقر بوفتاش ... كايش حية داخلة نغلة تنقر
و ياويح اللي كلاه صعب ما يبراش ... رانا شفنا كثير من الصحة ينضر
وهاذ البحر خاض بينا مايصفاش ... و فراقين كتوبنا راهم ياسر
بن ساري بلخير باني ذالكماش ... ياويح اللي طاح فيه ينكسر
الشاعر : بلخير بن ساري السعيدي (أنقوسة ورقلة)