السلام عليكم ورحمة الله تعالى وبركانه كيف الأحوال؟ان شاء الله تكونوا كامل بخير؟السمانا اللي فاتت جات عندنا وحدة حبيبتنا وجابتلنا قاطو امممممممم كي دقتو شحنتلها على الوصفة وعطاتهالي وجربتها وعجبني بزااااااف وطبعا حبيت ندي حتى انا الأجر ونشاركم بيها المهم الحاجة اللي نقولهالكم على هاد القاطو انو يجي بزااااف بنين وساااهل مايرفدش بزاف وقت كيما انا بديت فيه مع 9 وكملت قبل 11 نخليكم مع الوصفة: للعجينة: 200غ ربدة طرية 200غ سكر مسحوق 2بيض 600غ فرينة ولكن ماديروهاش كامل يعني غير كي تتلم العجينة العقدة: 200غ ربدة دايبة 200غ سكر عادي 300الى 400غ كاوكاو محمص ومطحون 2بيض عطر اللوز المر اذا وجد بعد ما تحضري العجينة تدهني الصينية وتسرحي العجينة ومن بعد تطليها بمعجون المشمش ومن بعد تزيدي فوقها العقدة وتدخليها تطيب غلى 200درجة لمدة 30 الى 40 درجة كي تخرجيها دوبي شكولاطة على حمام مائي ـانا ردت معاها الحليب باش كفاتني ودخليها للثلاجة تبرد ومن بعد قصيها وقدميها مع القهوة وبالصحة والهنا ملاحظة من الاحسن تستعملي صينية البقلاوة والشكولا استعملت الصخرة الذهبية لانها نجي كبيرة شوية نتمنى تجربوها وتعجبكم وماتنساونيش بدعوة خير في أمان الله