السلام عليكم و رحمة الله تعالى و بركاته
....................
أولا هاد الموضوع مهدى للأخت ...روح مراد.... ربي يهنيها
.............
...........................
بمناسبة زواج أختي .....
اليوم جبت ليكم عشا المشيخة هاكة يسمى في منطقتنا
الي هو عشاء الفاتحة الدي يقام فيه العقد الشرعي للزواج و هدا في بيت والد الزوجة وهاد العشاء يحضرو فيه غي الرجال الكبار يعني المشايخ على بيها يسمى عشا المشيخة نسبة للشيوخ و بطبيعة الحال الضيوف من اسرة الزوجين
...........................................
و العشاء مكون من كسكس بالزبيب و مدهون بالدهان الحر الي هو سمن معروف في منطقتنا و لحم الغنم مرفق بالملفوف شوفو هاد الرابط
https://www.djelfa.info/vb/showthread.php?t=1872400
و ادا كان الصيف يقدم معه البصل مقطع رقيق مع الطماطم و الديسار حسب كل عائلة واش تحب ... من قبل كانو يقدمو التمر بالحليب بصح مع غلاء التمر فيه مصروف كبير.....
و بعد العشاء يقدم الشاي مع الكوكاو نسيت ما صورتوش
.......
و هادا مقدم من طرف عائلة العريس يعني هما يجيبو القضيان كامل الي يكفي ليلة العشاء عادة يجيبوه يوم قبل الفاتحة و يسمى عندنا نهار الــدفــوع و هو مكون من الملح الى السكر مثلا ,زيت , (دقيق و فرينة) في مكان الكسكس لأنه أكيد عائلة العروسة يكونو موجدين الكسكس الجاف لهاد المناسبة و لفطور الحنة , شاي, قهوة , زبيب,صابون , مشروبات, فاكهة ,دهان حر , حتى الأواني البلاستكية مثل gobelet بمافيهم الكــبـشين ... وعائلة العروسة يقومو بالطهي أكيد
............
و العشاء تكفلت عمتي ربي يحفظها بطهي الكسكس و أختي الكبرى الله يهنيها تكفلت بمرق الكسكس
................................
و في اليوم الموالي تقام حنة العروس الي هو حفل يديره ليها باباها الي يحضرو فيها غي النساء من العائلتين يعني عائلة العريس تكون مكونة من والدته هي الي تحني للعروسة أو أي امرأة كبيرة في السن تختارها أم العريس و تكون جايبة معاها الذهب لعروستها حسب واش تكون متفقة العائلتين ... و عماته وخالاته و أخواته عادة ما يجوش بزاف ناس مع أهل العريس الأقرب الأقربين... يكون فيها فطور تانيك من كسكس و لحم و من بعد تقدم الحلوى مع قهوة و شاي و الدشيشة بالدهان الحر مع تصديرة العروسة.
https://www.djelfa.info/vb/showthread.php?t=1881511
https://www.djelfa.info/vb/showthread.php?t=1881967
...............
و بعدها بأيام تزف العروس لبيت زوجها الي يديرو هما تانيك العرس ديالهم
ملاحظة
يعني البنت العروس عندنا يقام لها العرس مرتين و تتصدر فيهم و تلبس أحلى حلة
العرس الأول في دار باباها من باب يفرح بابنته و يدير ليها عرس الي معروف عندنا بالحنة اول ما تخطب البنت الحاجة الاولى الناس من العائلة تسقسي وقتاش الحنة علاخاطرش يحضرو فيها عائلة العروسة بدون استثناء منها يفرحو معاها و منها يبقوها على خير خاصة الأهل و الأقارب الي يكونو بعاد...........
العرس الثاني يكون في بيت العريس أكيد
...........
أي استفسار أخواتي تفضلن
...............
باسم الله
هادوك طرشونات مشمخين بالماء علاجال الضيوف كي ياكلو اللحم اكيد بيديهم امالا من بعد يمسحو برك بهاد طرشونات المشمخيين و ما يبقاش بقايا اللحم في يديهم هي صراحة ناس بكري كانو يديرو ليقامة نتاع الغسيل مكونة من صابون حجرة و لا سائل و فوطة يكلفو شخص معين الضيوف غي يخلصو و يكملو الأكل يجوز عليهم هاد الشخص يغسلو يديهم بالصابون و ينشفو بالفوطة بصح تقدري تقولي هاد العفسة اندثرت و عوضناها بهاد الفكرة نتاع الطراشن المبللة
و هاد الطاجين للضياف الي ما يكلوش الكسكس
دعاء في ظهر الغيب