اقتباس:
المشاركة الأصلية كتبت بواسطة موسى عبد الله
السلام عليكم و رحمة الله و بركاته يا جماعة ما هو الداعي لرفض الفتاة الزواج و تفريطها في الزواج ، خاصة إذا كا من تقدم لها رافض لفكرة عملها سؤال و الله ما لقيت له جواب أفيدونا يرحمكم الله أقنعوني ربما اقتنعت
|
ممكن جوابي ما يقنعكش ؟ أو أكيد ما يقنعكش ، راح نحكي عن نفسي فقط
لما كنت أدرس في السنة الثالثة ابتدائي و بالتحديد في الفصل الأول تطلقت أمي مباشرة بعد وفاة جدي الله يرحمو ؟ لأنو الوالد رفض ذهابها للجنازة ، قالها تروحي راكي مطلقة هي راحت و ما ولاتش لأنو كانت القطرة التي أفظت الكأس، حملت سنين القهر الضرب الشتم لأنو كان يشرب لا يصلي لا يصوم ....
بعد شهور يعني في نفس السنة توفات والدتها الله يرحمها ، بعدها طردنا والدنا من البيت قالنا ديغاج، أتذكر الحادثة و كأنها اليوم رغم مرور سنوات عديدة عليها كنا كل جمعة نذب عند أمي و في المساء نعود و في احدى المرات عدنا فتح لنا الباب و قال لنا ديغاج روحو عند يماكم ؟؟؟
حنا عدنا عند يمانا و تصور كم كنا ؟؟؟ الصغيرة كانت رضيعة حديثة الولادة كانت من الأول مع أمي ، بعدها أنا كنت سنة ثالثة ابتدائي و أخت تكبرني سنة رابعة ابتدائي و أخ فوقها سنة خامسة ابتدائي و أخ آخر سنة ثانية ثانوي علمي و أخ آخر سنة ثانية ثانوي أدبي و أخت أكبر سنة أولى جامعي والأخت الكبرى جالسة بالبيت توقفت عن الدراسة و الأخ ال:بر أيضا لم يكن يدرس كان تكوين ميكانيك، كان هو الأول من خرج من المنزل بسبب الضرب و المشاكل و كان مستقر في بيت جدي و جدتي الله يرحمهم
رجعنا لعند الوالدة بثيابنا دون أوراق دون ملابس دون أي شيء ؟؟؟؟ جلسنا عدة شهور و الناس تتصدق علينا لا نملك حتى فرن نطيبو عليه ؟؟؟ توقفنا عن الدراسة جرينا باش جبنا أوراقنا الرسمية و بدلنا المدارس حتى 2 أخوالي الكبير ما كانش يحوس علينا يجمع مع أولادو ياكلو حنا نتفرجو والله باكي مقرون ما مدهولنا ؟ و خالي الأصغر ما عندوش الأولاد كان مع مرتو هجمو علينا سبان وعايرة و ظلم و حقرة .... قالنا جيتو تروثو و حنا ربي لي عالم بحالتنا ؟؟؟ أمي عادت عنيفة منهارة نفسيا ولات تعيط و تضارب و تدرب .... عشنا الجحيم حتى الناس كي تحقرنا ما نقدروش نرجعو إذا رجعنا ما تحوش تفهم تجري تضربنا حنا ؟؟؟
مستوانا الدراسي نزل كثبرا كنت من الخمسة الأوائل وليت ما قبل الأخيرة و اختي كانت الأولى تراجعت بزاف و أخي أيضا ما عادش يحب يروح يقرا، لي كانو في الليسي حبسو رغم أنو مستواهم كان جيد لي كان علمي كان عندو معدل 12 ولاو يخدمو عساسين في الليل و يقراو في النهار ما قدروش حبسو عيات معاهم يما قاتلهم أنا نخدم ما حبوش ولاو وين يلقو خدمة يخدمو يجبو مصروف للدار
بقينا بشويا وشيوا حتى هدنت الأوضاع و بدينا نوالفو حياتنا الجديدة
ماديا بدينا نتحسنو و بداو الخاوة يديرو مشاريع صغيرة بداو بجيسانك يخدمو بيه الطرونسبور رهنت يما ذهبها و سلفو شويا دراهم و شراوه و بداو يخدمو بيه موراها شراو ج 9 من بعد كارزان من بعد فورغون كبير مرسوداس شدو خويا تحت الكبير يخدم بيه الطرونسبور تاع السلعة و الكبير شد كارزان تاع صاحبو خلاهولو يخدم بيه و يخلصو و أخي الثالث لي كان علمي شرا طونوبيل و ولا يخدم مع لي قروسيست يليفري السلعة
حنا دراسيا بدينا نتحسنو شويا شويا مي ما وليناش من الأوائل كيما كنا ؟ أخي لي كان سنة خامسة كمل حتى للثامنة و حبس ما قدرش ، بعدها دار ستاج باتيسري و بدا يخدم
و أختي الجامعية كملت دراستها و سوتنات و بدات تخدم، تقري أدب عربي في الليسي، و عاونت أختي الأكبر و دارت ستاج تاع خياطة و ولات تخدم مرة على مرة ؟
أنا و اختي لي كنا في البريمار كملنا حتى جبنا الباك حنا الاثنين في العام لي تزوجت فيه اختي لي تقري كانت أول فرحة تدخل للدار تاع الصح
أحوالنا الآن الحمد لله ما لا نهاية مرة تحسنت بزاااااااااااااااااااااف الحمد لله
نبدا بيما راحت عمرة مرة ليها و مرة لماني الله يرحمها و راهي ناوية تزيد تروح لجدي الله يرحمو ، الله يرحمهم و يوسع عليهم سترونا و هوما حيين و سترونا حتى و هوما ميتين
أخي الكبير كان طايش شويا و ويدارب بزاف ز يدير المشاكل ليما بصح ملي تزوج استعقل الحمد لله ولا انسان وحداخر راه متزوج و عندو طفل و مرتو راهي أونسانت بالثاني الله يبارك راه دركا شريك بفي كافيتيريا الحمد لله و عندو دار بنا الطابق تاعو بعد ما كان كاري كي تزوج.
أختي الكبيرة مازال ما تزوجتش ربي يبعتلها وليد الحلال ان شاء الله و يرزقها بالذرية الصالحة ان شاء الله راهي تخدم في الدار البراج، المقروط، الكسرة ..... تخدم و تبيع لخاوتي راهي الله يبارك مدخولها أحسن منا حنا لي قرينا هههههههه ربي يزيدلها ان شاء الله
أختي لي تحتها لي ولات تقري في الليسي ترسمت و دارت بلاصتها و ولات أستاذة معروفة يقولو عليها واعرة و مزيرة ههههههه دارت كتب و نجحولها راهي الآن متزوجة و عندها ولدين و بنت ربي يحفظهوملها
أخي لي تحتها راه قدام خويا الكبير شريك في بيتزيريا متزوج و عندو ولدين و بنت و مرتو راهي أونسانت و باني الطابق تاعو بعد ما كان كاري هو أيضا الحمد لله
و أخي لي تحتو دركا عندو محل تاع مطلوع و متزوج و عندو ولدين و بالطابق تاعو لي بناه بعد ما كان كاري أيضا الحمد لله
و أخي لي تحتو لي دار ستاج باتيسري أيضا بمحلو تاع المطلوع و راه يبني في الطابق تاعو باش يتزوج قريبا ان شاء الله
و أختي لي تحتو كملت دارت تخصص علم النفس التربوي و راهي تقري في الابتدائي مازال ما جاهاش مكتوبها ربي يبعتلها وليد فاميليا و يرزقها ربي بالذرية الصالحة ان شاء الله
و بعدها أنا كملت أيضا دراستي ليسانس في إدارة أعمال و راني نخدم في شركة خاصة و تزوجت العام لي فات و راني قريب نزيد ان شاء الله
و آخر العنقود دارت كملت أيضا و تحصلت على ماستر في العلوم السياسية تخصص علاقات دولية و راهي تخدم في النهار ههههه ما عندهاش بزاف ملي بدات ربي ينجحها و يرزقها بالزوج الصالح و الذرية الصالحة ان شاء الله
الوالد في الأعوام الأخيرة حب يعاود يردنا بشتى الطرق في الأول كان رفض قاطع دون نقاش الآن رانا نزوروه مرة على مرة عاود تزوج و عندو 3 أولاد و بنت وليدو الكبير فيهم تحصل هاذ العام على شهادة الباكالوريا كي رحت في العيد لعندهم قالي الوالد أنتوما البنات نجحتو في القرايا بصح الذكورة ما نجحوش عندي غير هاذا نجحلي أنا زعفت بزاف من الهدرة هاذي و قلتلو هوما كانو يخدمو علينا و يقراو ما قدروش يكملو حبسو علاجال الظروف و قلتلو لوكان ما هوما ما نجحو حنا علاجال هوما لي كانو يخدمو علينا
كان النفقة بسيف لا يبعتها كل شخص يبعت 1000 دج و الذكورة غير يلحقو سن 18 ينقص هذيك 1000 دج و ما كانش يبعثها كل شهر ؟؟؟ ما كانش مخصوص كان لاباس بيه ماديا و كان ربي سبحانو يزيد يغرقو في الدراهم حتى عاد غني عندو فيلا ب4 طوابق كل طابق قاسمو ل 2 و كاريه بلا الخدمة تاعو لي كان يجيب منها الله يبارك وليدو الكبير من مرتو الثانية قبل ما يقفل 18 سنة شرالو طونوبيل بولو ؟؟؟
المهم الانسان ما يقدرش يينسى بالاك يتناسى و يسامح باش يقدر يعيش مرتاح نفسيا
عن نفسي نشجع اي امرأة تكون متعلمة و تعرف تسلك خيوطها علاجال هذي دنيا غدارة ما تعرفش بين ليلة و ضحاها واش يقدر يصرالك ؟ و عن الاختلاط و الحلال و الحرام بخصوص عمل المرأة ، كل شخص يعرف نفسو و يعمل حدود لنفسو في التعامل مع الناس على حساب الحلال و الحرام أنا عن نفسي الحمد لله عمري ما لحقت واحد من خاوتي يقولي غلطتي نعرف حدودي مليح و حتى خياتي الناس كامل تشهد بتربيتنا و أخلاقنا سواء الذكور أو الاناث الحمد لله رغم الظروف القاسية و واحد أو وحدة خرجو طريق أو جبنا العار ليمانا بالعكس رفعنالها راسها و نجحنا كامل كيما رانا الحمد لله يا ربي