السلام عليكم و رحمة الله و بركاته البارح في العشاء درت بوراك بالدجاج ب sauce au fromage يخرج بنين هايل . صدر دجاج او اقل (على حساب عدد الافراد) بصلة + 02 سنينات ثوم حبيبات زيتون مغليين و مقطعين دوائر قليل من الفطر (ليس ضروري) قليل من الملح + فلفل اسود + سكنجبير نقلي الدجاج مع الزيت حتى يتحمر نضيفلوا البصل مقطع صغير مع الثوم . حطي الملح (شويا ) +فلفل اسود + سكنجبير + الماء باش يطيب الدجاج. زيدي الزيتون المقطع دوائر مع الفطر المقطع شرائح. كي يطيب و تكون لا صوص نشفت نحيو الدجاج و نفتتوه و نروحوا نوجدوا لا صوص بالجبن : كأس حليب بارد نحطولو ملعقة كبيرة و نصف مايزينة + حبة بيض و نخلطوا جيدا و نحطوها فوق النار مع التحريك حتى تثقال. كي تثقال انحوها من النار و نزيدولها 02 قطع تاع fromage chef مع شويا gruyere او chedar و اي نوع من الجبن اللي تفضليه و خلطي حتى يذوب زيدي فلفل اسود . خذي الدجاج المفتت و اخلطيه مع صوص الجبن و خليها تبرد ثم شكلي البوراك نتاعك و قليه. نتمنى تكون عجبتكم و تجربوها باذن الله و تدعولي بالخير شكرا