السلام عليكم ورحمة الله تعالى وبركاته كيفكم حبيباتي ان شاء الله تكونوا كامل لاباس اليوم جبتلكم تطبيقي لوصفة الاخت الغالية amirateljazayer ربي يحفظها ويعطيها صحيحتها الوصفة اسمها صابلي البطاطا درتها مع شوية اضافات من عندي كالعادة لازم اللمسة تاعي واش انقوللكم جات روووووعة وف الدار كامل عجبتهم الحمد لله وخويا من الصبح وهو يقولي ديريلي صابلي تاع البطاطا كيما تاع البارح وانا انقولو روح اخطيني اليوم ماشي دالتي تاع الطياب هههههههههههههه مسكين امزية صبت شوية حبيبات فضلو من البارح رايحة انسخنهوملو ف العشا باش يسكت عليا غاضني مسكين المهم حبيت نشارككم بهاد الوصفة الرائعة ونشكر بزاف مولات الوصفة للمرة الاف نبداو بسم الله بالمقادير كمية من البطاطا مقطعة دوائر ماشي رقاق وماشي خشان بزاف اطراف تاع الجاج على حسب افرد العائلة كمية من الجبن الابيض كمية من الشومبينيون كمية من الجلبانة حبة بصل كمية من الشابلوغ اربع حبات بيض ملح وتوابل كل واحدة واش اتحب اتدير طريقة التحضير اول حاجة البطاطا نقلوها وانخلوها تقطر انديرو الزيت ف الكوكوطة وانجمرو البصل شوية ثم انضيفو الملح والتوابل والشومبينيون وانخلوهم يتجمرو شوية ثم انضيفو اطراف الدجاج وانخليه يتجمر مليح مليح ثم انمرقو بكاس ف الاول نحسبو خمس دقايق انضيفو كاس واحدوخر ثم نحسبو خمس دقايق وانرقو بزوج كيسان وكي تغلي انديرو الجلبانة ونغلقو عليها وانقصولها النار البطاطا تاعنا تكون قطرت وبردت نحكمو سنيوة انستفو فيها البطاطا اللي ف نفس المقاس كي الصابلي ونحكمو بالواحدة ونطلوها بالفرماج مليح وانلصقو معاها واحدة تانية وانغطسوها ف البيض ثم الشابلوغ ثم نقولها وهكذا حتى انكمل كامل البطاطا تاعي بالطبع راح يفضلولكم شوية دوائر تاع اليطاطا معندهمش اللي يوالموهم ولا يجو رقاق شوية راكي تعرفي مين داك الموس يهربلك كي تكوني تقطعي هديك البطاطا خليها بجيه راكي رايحة تسحقيها من بعد كي انكلمو انستفو البطاطا الصابلي تاعنا مع البطاطا اللي فضلت وانحطو المرقة كل واحدة كيفاش اتحب اتزيين الطبق ديالها ان شاء الله ايكون تطبيقي عجبكم ربي يخلي الاخت مولات الوصفة ويعطيها ماتتمنى انخليكم مع الصور بالهناء والشفاء متنساونيش من دعواتكم