البسملة1
صباح الورد و الفل على أحلى عضوات بالمنتدى ليكم وحشة كبيرة حبيباتي
إن شاء الله راح نقدملكم حلوى قديمة بطريقة جديدة بنينة و شكلها جميل خاصة أنو عيد الأضحى المبارك على الأبواب بالمناسبة نتمنالكم عيد سعيد
أكيد تعرفو المشوك و ماكانش أسهل منو لأنو أصلا عبارة عن عجينة صابلي فقط مضاف إليها مكسرات مرحية ناعم
و مادام بيناتنا مبتدئات نحب دائما نقدم وصفاتي و مواضيعي بالتفصيل الممل
إليك أختي العزيزة الطريقة مفصلة
مقادير العجينة :
- 500غ مرغرين (نفضل صول لأنها ما تطلقش ليدام أثناء الطياب عكس لابال)
- كاس سكر رطب
- كاس لوز مرحي ناعم
- 4 صفار بيض (نحتفظو بالبياض نحتاجوه من بعد)
- 1 خميرة الحلوى
- فرينة للم العجينة
مقادير التزيين:
-4 بياض بيض (اللي احتفظنا بيهم) فقط اخفقيهم بالشوكة قليلا لنزع التكتلات
- لوز إيفيلي أو شرائح اللوز (هنا استعملت حوالي 400 غ )
- كرز مصبر نحتاج علبة (فقط اقسمي الحبة على زوج طوليا )
- و نحتاج عسل لتعسيل الحلوى حوالي 500 إلى 600 غ مخففة بحوالي كاس نتاع أتاي ماء زهر
- و كذلك كيسات لطهي الحلوى و كيسات للتقديم (لأنو اللي راح نطهوهم فيها راح يتشربو شوية دهن و راح يخسرو لذلك أي كيسات عندك ما تحتاجيهمش استعمليهم لطهي الحلوى
للعجينة:
امحري بكف يدك المرغرين بحركات دائرية ثم ضفي السكر مع مواصلة المحر مدة 2 إلى 3 د ثم ضفي الصفار واحدة بواحدة ثم اللوز المرحي و خلطي مليح ثم ضفي الفرينة و الخميرة حتان تتحصلي على عجينة طرية كيما الصابلي العادية’
اعملي كويرات بحجم حبة الجوز (راح يتنفخوا لازم يكونو صغار شوية)
غطسي الكويرات واحدة بواحدة في بياض البيض و ارفديها بالخف و رمديها مباشرة في اللوز إيفيلي
حاولي تلصقي أكبر عدد ممكن من شرائح اللوز على سطح الحلوى
ثم ثبتي نصف حبة كرز وسط الكويرة و اضغطي غير بالشوية باش تلصق
حطيها في كيسات اللي قلنا ما نحتاجوهمش و حطيها في فرن مسخن مسبقا على درجة حرارة 180° حتان تحمار من تحت
كي يخرجو عسليهم و هوما سخونين بعسيلة باردة و مخففة بماء الزهر (حكينا على مقاديرها مسبقا)
هام ليك غير كيما خرجو وعسلتهم
هذي صورة مقربة باش تشوفي الكيسات اللي طابت الحلوى فيها كيفاش تعمرت بالدهن
هذا سبب تغيير الكيسات
و هذا الشكل النهائي أنا هنا رشيت من فوق شوية لماع وردي اللون
رطل مرغرين عملتلي الكمية هذي حوالي 65 إلى 75 حبة حسب حجم الكويرات
نتمنى تكون عجبتكم الحلوى لأنها فعلا رائعة في البنة و مقرمشة من برا يميمي
ما تنساونيش بدعوة بظهر الغيب لي و لأخواتي حبيباتي
بصحتكم و عيدكم مبارك