[ninafret]

السلام عليكن كنت وعدت بعض الاخوات بتقديم خبز البانيني على طريقتي الخاصة وراني جبتهولكم بالتفصيل الممل راح يجيكم خفيف ولذيذ ومايتشبعش وبعجينتي الساهلة كيما عودتكم اللي مقاديرها مضبوطة وماحتاجش للعجن
وحبيت نبشركم بلي راني اخترعت طريقة جديدة لعمل الشاورما ساهلة وماتحتاجش للفرن وراح تاخد منكم ربع ساعة لا غير علابالي تموتو على الساهل كيما انا وراني سميتها شاورما إكسبراس






في صحن حطي كاس ماء دافي مع ملعقة سكر وملح حسب الرغبة وملعقة كبيرة خميرة الخبز 4 ملاعق كبيرة زيت عادي خلطي بالملعقة




زيدي فوقهم فرينة مغربلة بالتدريج ومعاها نصف باكي خميرة الحلوى وخلطي بملعقة خشب حتى تتحصلي على عجينة طرية ولينى وتلصق شوية برك حطيها في كيس واغلي عليها كيما متعودين وخليها تختمر حتى يتضاعف حجمها اعتقد هاد الخطوات تعودتو عليهم معايا ومافيش داعي للصور
كي تختمر قسميها بالسكين على 4 قطع متساوية



على سطح مدهون بالزيت حلي الكويرة الاولى بالحلال بعد ماتدهني وجهها بشوية زيت لتسهيل العملية





روليها على بعصها كيما تعملي السويس رول وعدليها حتى تاخد شكل الخبزة









حطيها في مول مدهون بالزيت وماتنسايش تحطي الجيهة المفتوحة من تحت



كملي بنفس الطريقة مع باقي الكويرات وبعديهم على بعضهم لانهم يزيدو يخمرو
سخني شوية الفرن حتى يدفى وطفيه ودخلي الخبزات يزيدو يتخمرو فيه حتى يتضاعف حجمهم تماما خطوة مهمة جدا ممكن شي 45د لاننا في الشتاء



كي يتخمرو مليح دخليهم لفرن ساخن وطيبيهم على بياض يعني مالازمش يحمارو
خليهم يبردو تماما حتى يجيك الخبز خفيف وماشي معجن
الحشو اولا تحضير شاورما اكسبراس على طريقة نينا



في مقلات حطي زوج ملاعق زيت وحطي شرائح من السكالوب او صدر الدجاج او الداند غطيهم وخليهم 3دقايق واقلبيهم من الجهة الثانية ثلاث دقائق اخرى بعد ماتغطيهم وفكرة الغطاء انها تخلي الدجاج يستوي من الداخل وفي نفس الوقت يبقى طري من برا






نحيه وفتتيه شرائح بيدك



عاودي رديه في نفس المقلات وزيدي فوقو الخلطة الخاصة بالشاورما واللي هي
ابرشي نصف حبة صغيرة بصل مع زوج سنات ثوم زيديلهم ملعقة كبيرة خل ونصف ملعقة صغيرة من الفلفل الاسود والكسبر المرحي والكمون ومعاهم الملح وملعقة من الهريسة وزوج ملاعق ماءخلطي الكل وصبيه فوق السكالوب فوق النار



وخلطيهم على نار قوية زوج دقايق مع التحريك حتة تدخل المكونات مليح فيه وطفي النار وزيدي زوج ملاعق كبيرة ماء زيدي خلطي امممممم

جهزي سلاطة او خس وطماطم شرائح وقطه جبن وبطاطا مقلية








كي يبرد البانيني حليه بالسكين وحطي طبقة من البطاطا المقلية



وفوقها طبقة من السلاطة وتعمدت نحطها في الوسط حتى ماتذبلش وقت التسخين و



ديري فوقها طبقة من الشاورما والصوص اللي فيها وفوقها قطع الجبن



زووووووووم



اغلقي الساندويتش بلطف وحطيه في الآلة الخاصة بيه حتى يتحمص ويتكومبونصا





وهدا شكلو امممممممممممممممممممممم














واللي ماعندهاش لاماشين آ بانيني نوريلكم طريقة اخرى ماتخافوش مانخليكمش بسخفتكم
الخبز خليه يزيد يتحمر شوية يعني ماتطيبيهش على بياض هكدا



وكي تحشيه غلفيه مليح بورق الالمنيوم



سخني مليح الحداد او الحديد او المكواة اللي نكويو بيها الملابس =لوفار آروباسي= وفوتيها فوق هداك السندويتش المفلف بالالمنيوم حتى تحسي انو رجع رقيق راح تتحصلي على نتيجة هايلة الفرق الوحيد انو مايكونش فيها خطوط نتاع الشواية


وقدميها
جربوه وراح يعجبكم بزاف بزاف
والحشو انتوما اتحكمو في كميتو انا مليت الساندويتشات

ملاحظة المقادير اللي اعطيتهالكم تخرجلكم 4 حبات بانيني كيما اللي في الصورة


وفي الاخير نتمنى يكون عجبكم وقولولي رايكم وراني نستنى تطبيقكم