سلام حبوباتي الغاليات هاذ لعشية درت كيكة بالفلان والفواكه المتبقية عندي حبة تفاح وحبة كيوي وحبة برتقال وحبة موز وجات تهبل حبيت تشوفوها وتجربوها نشالله راهي تستاهل التجربة حنونات بلا مانطول الهدرة على خاطر رايحة نكثر التصاور ههههه الطبقة الأولى: 2 بيضات+ 3مغارف كبار سكر + رشة ملح ومغرف صغيرة فاني خبطي مليح وزيديلهم 6 مغارف حليب و 6 مغارف زيت و6 مغارف فرينة وباكي خميرة حطيها طيب وديري عليها الطبقة الثانية. كي طيب أسقيها بشوي عصير طبيعي تاع البرتقال أو أي عصير يكون عندك. الطبقة الثانية: كي طيب المسكوتة تاعك ديري عليها: الفواكه لي بقاولك مقطعين مربعات ومخلطة معاهم 2 بايط ياؤورت فراز تاع الفواكه صومام ( من الأحسن)على خاطر ماعنديش لفراز فعوضتو بالياؤورت خلطي مليح وحطيه على المسكوتة وسوي الوجه مليح وزيدي عليها الطبقة الثالثة. الطبقة الثالثة: نصف لتر حليب مع باكي فلان إختياري و2 مغارف كبار سكر و2 مغارف كبار نشاء وحطيهم على النار حتى يغليو خليهم يدفاو فقط شوي وحطيهم على الفواكه وحطيها تبرد مليح وقدميها وشهية طيبة للطيبات الحنونات. وزينيها بالكراميل أو أي شيء تحبيه.